«قورعاس» شەكارا ماڭى ىنتىماقتاستىعى حالىقارالىق ورتالىعى (شىحو) جۇمىسىن باستادى. ەكى ەل اراسىنداعى ەكونوميكالىق بايلانىس پەن ءتۋريزمنىڭ دامۋىنا ارقاۋ بولعان بەكەتتىڭ جۇمىسى جاڭاشا جاندانباق.
بۇرىنعىداي ەمەس, مۇندا جۇك تاسىمالداۋ ەرەجەسى وزگەرگەن. بىرىنشىدەن, ەندى ورتالىقتىڭ قازاقستان بولىگىندە تاكسي جۇرگىزۋشىلەرى جۇرمەيدى, ادامدار تەك اۆتوبۋسپەن قاتىنايدى. ەكىنشىدەن, تاۋار الۋعا كەلگەن جەكە تۇلعا ءبىر ايدا 31 كگ-دان ارتىق جۇك الىپ كەتە المايدى. زاتتاردىڭ جالپى قۇنى مىڭ ەۋرودان اسپاۋى كەرەك. ساتىپ الۋشىلار اۆتوبۋسقا 5 كگ جۇك قانا الىپ كىرەدى. قالعانىن اۋەجايداعىداي جۇك تاسىمالداۋ پۋنكتىنە تاپسىرۋعا مىندەتتى. بولاشاقتا مۇندا تاعى 14 جاڭا جوبانى ىسكە اسىرۋ جوسپارلانىپ وتىر.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, ءتۋريزمنىڭ بۇل تۇرىندەگى نەگىزگى ماسەلەلەردىڭ ءبىرى – شەكارادان ءوتۋ جانە كىرۋ شارتتارى. سول سەبەپتى «Visit Zhetysu» تۋريستىك اقپاراتتىق ورتالىعى تۋريستىك بيزنەس وكىلدەرى, باق جانە بلوگەرلەر ءۇشىن «جىبەك جولى» اقپاراتتىق تۋرىن ۇيىمداستىرعان.
اقپاراتتىق تۋر اياسىندا قاتىسۋشىلارعا «قورعاس» شىحو-نىڭ قاجەتتى اقپاراتىن الۋعا مۇمكىندىك تۋدى. سونداي-اق ورتالىققا بارۋ شارتتارىمەن جانە ينفراقۇرىلىمدىق نىساندارمەن تانىستى. شارا سوڭىندا تۋروپەراتورلار جاڭا تۋريستىك ءونىمدى ازىرلەمەك. ودان بولەك «قورعاس» شىحو-دا بار تۋرلاردى جەتىلدىرەدى, ولاردى جاڭا تۋريستىك نىساندارمەن نەمەسە قىزمەتتەرمەن تولىقتىرادى.
ال ءوز كەزەگىندە باق وكىلدەرى مەن بلوگەرلەردىڭ ارقاسىندا بۇقارالىق اقپارات قۇرالدارى مەن الەۋمەتتىك جەلىلەردە جاريالاۋ ارقىلى حالىق اراسىندا وسى دەستيناتسيانىڭ تانىمالدىعى ارتادى, وسىلايشا تۋريستەردىڭ قاتىسۋىن ۇلعايتۋعا مۇمكىندىك بەرەدى.
كوپكە ايان, ۇلى جىبەك جولى – شوپينگتىڭ نەگىزگى باعىتتارىنىڭ ءبىرى. بۇگىندە بۇل ساۋدا جولى الەمنىڭ تۇكپىر-تۇكپىرىنەن ادامداردى تارتۋدى جالعاستىرىپ وتىر. وتكەل زالدارىندا ۇلكەن كەزەكتەردىڭ الدىن الۋ ءۇشىن كەلۋشىلەرگە بيلەتتەردى ونلاين ساتىپ الۋدىڭ جەڭىلدەتىلگەن جۇيەسى ىسكە قوسىلدى. بيلەتتىڭ قۇنى ءبىر ادامعا شامامەن 3000 تەڭگەنى قۇرايدى. ورتالىق اشىلعاننان كەيىن كۇنىنە 3 مىڭ ادام قابىلداۋعا مۇمكىندىك بار.
تاعى دا ايتا كەتەيىك, ورتالىققا ءوتۋ قازاقستان ازاماتتارى جەكە كۋالىكتەرىمەن, شەتەل ازاماتتارى حالىقارالىق شەكارادان ءوتۋ تارتىبىمەن راسىمدەلەدى. ەل اۋماعىندا تۇراتىن ءار ازامات ورتالىقتان ايىنا ءبىر رەت 31 كگ تاۋاردى باج سالىعىنسىز اكەتە الادى. مولشەردەن 5 كەلى عانا اسۋعا رۇقسات ەتىلەدى. ارتىق سالماقتىڭ 1 كگ 4 ەۋرودان تولەماقى تولەيدى. كەلۋشىلەردەن باگاج قابىلداۋ ساعات 9:00-دەن 17.30-عا دەيىن جۇزەگە اسادى. شىحو-نىڭ قىتاي بولىگىندەگى ساۋدا ورىندارى 17.30-عا دەيىن جۇمىس ىستەيدى. اۆتوبۋستار 20 مينۋتتىق ينتەرۆالمەن جۇرەدى.
جەتىسۋ وبلىسى