ءىرى ءوندىرىس ورىندارىنىڭ الەۋمەتتىك جوبالارعا اتسالىسۋى ماڭىزدى-اق. كەن بايلىقتى يگەرىپ قانا قويماي ونىڭ شاراپاتى سول وڭىرگە دە ءتيىپ جاتسا, ەل ىشىندەگى ءبىراز كۇرمەۋ شەشىلىپ قالارى انىق قوي. سونداي ءبىر ىمىراعا باستاعان ىنتىماقتاستىق تۋرالى مەموراندۋمعا «قازاقمىس» كورپوراتسياسى» جشس-مەن ءوڭىر اكىمدىگى قول قويدى. وسى مەموراندۋم ارقىلى قاراعاندى وبلىسىندا 15 جوبانى جۇزەگە اسىرۋدى «قازاقمىس» ءوز موينىنا الىپ وتىر.
قاراعاندى وبلىسى اكىمىنىڭ ورىنباسارى ەرمەك الپىسوۆ پەن «Kazakhmys Holding» جشس ESG جوباسىنىڭ جەتەكشىسى ساكەن شاياحمەتوۆ قولىمەن بەكىگەن ءوزارا ىنتىماقتاستىقتى نىعايتاتىن قۇجاتتا كوپتەگەن الەۋمەتتىك ماسەلەلەر قامتىلعان.
بۇل مەموراندۋم ارقىلى «قازاقمىس» كورپوراتسياسى ءوزى كەن يگەرگەن اۋدان-قالادا بىرقاتار جوبالاردى ىسكە اسىرادى. ياعني سول وڭىرلەردىڭ ينفراقۇرىلىمىن دامىتىپ, اباتتاندىرىلۋىنا كومەك بەرۋى ءتيىس.
سونىڭ اراسىندا بالقاش قالاسى ءبىرىنشى كەزەكتە. بالقاش تابانىنان كەن ءوندىرۋشى كومپانيا الداعى كەزەڭدە شاھاردىڭ تىنىس-تىرشىلىگىنە ىقپال ەتەر مىندەتتەمە الدى.
اتاپ ايتقاندا, تاياۋ جىلدارى بالقاشتا باس كارىز كوللەكتورىنىڭ 2,1 شاقىرىمدى اپاتتىق ۋچاسكەسى كورپوراتسيا تاراپىنان اعىمداعى جوندەۋدەن وتەدى. بۇرىنعى ەمحانا عيماراتى دا قايتا جاڭارىپ, بالاباقشا رەتىندە ىسكە قوسىلاتىن بولادى. ۋربانيستيكا ورتالىعىمەن بىرلەسىپ, قالانى اباتتاندىرۋ جوبالارى ەل يگىلىگىنە بەرىلەدى. سونداي-اق «قازاقمىس» كورپوراتسياسى بالقاش قالاسىنىڭ تىرشىلىكتى قامتاماسىز ەتۋ جەلىلەرىنىڭ كەيبىرەۋىنىڭ جوبالىق-سمەتالىق قۇجاتتاماسىن قارجىلاندىرادى.
مەموراندۋمدا «قازاقمىس» ۇلەس قوساتىن باسقا دا جوبالار بار. ونىڭ ىشىندە, كومپانيا قارقارالى اۋدانى ابىز اۋىلىنداعى مەكتەپتى جوندەۋگە قولداۋ كورسەتەدى. اقتاۋ كەنتىندەگى بەس قاباتتى ەكى ءۇيدىڭ شاتىرىن جوندەۋ دە ولاردىڭ الداعى جوسپارىنا ىلىككەن.
جالپى, الەۋمەتتىك ارىپتەستىك تۋرالى مەموراندۋمعا قول قويۋ ءوڭىردىڭ دامۋىنا سەرپىن بەرەدى دەپ كۇتىلۋدە.
قاراعاندى وبلىسى