ا.بايتۇرسىن ۇلى اتىنداعى قوستاناي ۋنيۆەرسيتەتىندە فيلولوگيا عىلىمدارىنىڭ دوكتورى, پروفەسسور الماسبەك ابسادىقتىڭ كەيكى باتىر تۋرالى جاڭا جيناعىنىڭ تۇساۋى كەسىلدى.
عىلىمي-تانىمدىق ءمانى زور ءىس-شاراعا ءوڭىر زيالىلارى, ۋنيۆەرسيتەت وقىتۋشىلارى مەن ستۋدەنتتەر قاتىستى. سالتاناتتى راسىمگە ونلاين جۇيەسىندە قوسىلعان بەلگىلى تاريحشى بۇركىتباي اياعان, نازيرا باكىرقىزى سىندى عالىمدار جاڭا جيناقتى جوعارى باعالاپ, اۆتورعا جىلى لەبىزدەرىن ءبىلدىردى.
وسىدان بىرنەشە جىل بۇرىن الماسبەك ابسادىقتىڭ جەتەكشىلىگىمەن «كەيكى باتىر ىزىمەن» ەكسپەديتسياسى ۇيىمداستىرىلعان بولاتىن. تورعايداعى ۇلت-ازاتتىق كوتەرىلىسىنىڭ باس ساردارى امانكەلدى يمانوۆتىڭ 150 جىلدىعى اياسىندا جارىق كورگەن جاڭا جيناقتىڭ «تانىم» دەپ اتالاتىن العاشقى بولىمىنە سول عىلىمي-تانىمدىق ساپاردىڭ ماتەريالدارى ەنىپ وتىر. ەكسپەديتسيا مۇشەلەرىنىڭ سوزىنە قاراعاندا, كەيكى كوكەمباي ۇلىنىڭ ەرلىك عۇمىرناماسىنا قاتىستى ءبىرشاما تىڭ دەرەكتەر قامتىلعان ەڭبەك 3 مىڭ دانا بولىپ شىققان.
– ساپار بارىسىندا ءبىز امانكەلدى, جانگەلدين اۋداندارىندا بولىپ, كونەكوز قاريالاردىڭ اۋزىنان ءبىرشاما دەرەكتەردى جازىپ الدىق. اقساقالداردىڭ ايتۋىنشا, تورعاي ءۇشىن بولعان كەسكىلەسكەن شايقاستا كەيكى باتىر مەرگەندەر جاساعىن باسقارىپ, ۇلكەن ەرلىك كورسەتكەن. بەكىنىسكە مىقتاپ بەكىنىپ العان پۋلەمەتشىلەر وقتى قارداي بوراتىپ, كوتەرىلىسشىلەردى العا باستىرماي قويعان. امانكەلدى ساربازدارىن بۇل تىعىرىقتان الىپ شىققان نارسە – كەيكىنىڭ مەرگەندىگى, ەرلىگى. قول مەرگەن باسقارعان جاساق پۋلەمەتشىلەردى الىستان اتىپ ءتۇسىرىپ وتىرعان. سودان باستاپ كەيكى باتىر اتانعان, – دەيدى جيناقتىڭ اۆتورى الماسبەك ابسادىق.
«ەر كەيكى – ەل ەسىندە» كىتابىنىڭ «تاعزىم» دەپ اتالاتىن ەكىنشى بولىمىنە ازات دالانىڭ ات ۇستىندە قاسقايعان كۇيى وققا ۇشقان ەڭ سوڭعى جاۋىنگەرىنىڭ ەرلىك ءداستۇرىن زەردەلەپ جۇرگەن عالىمدار مەن قالامگەرلەردىڭ ەڭبەكتەرى ەنگەن.
جيناق بارلىق وڭىرلەردەگى كىتاپحانالارعا تاراتىلاتىن بولادى.
قوستاناي وبلىسى