تىكەلەي ەفيردە ەردوعاننىڭ سۇحباتى بارىسىندا كىشىگىرىم ءۇزىلىس بولدى. وعان سەبەپ تۇركيا پرەزيدەنتىنىڭ دەنساۋلىعىنىڭ سىر بەرۋى ەدى, دەپ حابارلايدى Egemen.kz ريا نوۆوستي اگەنتتىگىنە سىلتەمە جاساپ.
اگەنتتىكتىڭ حابارلاۋىنشا, ەردوعاننىڭ سايلاۋ الدىنداعى تىعىز جۇمىس كەستەسىنە بايلانىستى سۇحبات كەشكى ۋاقىتتا باستالعان. جۋرناليست بولاشاق مينيسترلەر كابينەتىندەگى وزگەرىستەر تۋرالى سۇراق قويا باستاعان ساتتە تىكەلەي ەفير كەنەت ءۇزىلدى. الەۋمەتتىك جەلىدە تىكەلەي ەفير ۇزىلگەن ساتتە تۇسىرىلگەن كادرلار تاراپ كەتتى. ۆيدەودان جوتەلگەن داۋىس ەستىلگەن.
ءبىراز ءۇزىلىس وتكەن سوڭ پرەزيدەنت تىكەلەي ەفيرگە قايتا قوسىلعان, الايدا مودەراتوردىڭ ەكى قىسقا سۇراعىنان كەيىن حابار اياقتالعان. وسى رەتتە ەردوعان ەفيردى جالعاستىرا الماعانى ءۇشىن تۇركيا ازاماتتارىنان كەشىرىم سۇراعان.
«بىرىنشىدەن, سىزدەرگە دەنساۋلىق تىلەيمىن. كەشە جانە بۇگىن سايلاۋالدى ۇگىت-ناسيحات جۇمىستارى قىزۋ ءجۇردى. تۇماۋ جۇقتىرىپ الدىم. ءتىپتى «باعدارلامانى وتكىزبەۋ كەرەك پە؟» دەپ تە ويلادىم. بىراق ءبىز ۋادە بەرگەن سوڭ كەلدىك. سىزدەردەن جانە كورەرمەندەرىمىزدەن كەشىرىم سۇرايمىن», دەدى تۇركيانىڭ مەملەكەت باسشىسى.