الماتىدا قازاقستانداعى بۇلتتى تەحنولوگيالاردىڭ بولاشاعى, IT نارىعىنداعى ترەندتەر جانە كيبەرقاۋىپسىزدىك بويىنشا كونفەرەنتسيا ءوتتى, دەپ حابارلايدى Egemen.kz.
IT ماماندار باس قوسقان جيىن بارىسىندا الەمدىك نارىق جانە سەرۆيستىك قاجەتتىلىكتەر بويىنشا ۇسىنىستار ايتىلدى. ساراپشىلار قازاقستان IT نارىعىنىڭ ترەندتەرى جانە بۇلتتى پلاتفورمالار, قوسىمشالاردىڭ قاۋىپسىزدىگىن قامتاماسىز ەتۋ تاسىلدەرى تۋرالى ايتىپ, جۋرناليستەردىڭ سۇراقتارىنا جاۋاپ بەردى.
وسى ورايدا قازاقستاندا شاعىن جانە ءىرى بيزنەستى تسيفرلاندىرۋعا ارنالعان VK Cloud بۇلتتى پلاتفورماسى QazCloud-پەن سەرىكتەستىك ورناتۋى تاياۋ كەلەشەكتە بۇل باعىتتاعى تۇيتكىلدى ماسەلەلەردى شەشۋگە ىقپال ەتەدى. بىرىنشىدەن, سەرۆيستىك قىزمەت اياسى كەڭەيەتىن بولسا, ەكىنشىدەن IT مامانداردىڭ بىلىكتىلىگىن ارتتىرۋعا ىقپال ەتەدى. VK Cloud تەحنولوگياسى مەن قىزمەتى ءىرى جانە شاعىن كاسىپ پەن ستارتاپتاردىڭ ساندىق جوبالارىن دامىتۋعا, ولاردى نارىققا تەزىرەك شىعارۋعا جانە يكەمدى ماسشتابتاۋعا كومەكتەسەدى. بۇلت پلاتفورماسى قازاقستان كومپانيالارىنا بەيىمدەلە وتىرىپ, ەل زاڭناماسىنا سايكەس QazCloud ساندىق ورتالىعىندا ورنالاساتىن بولادى.
بۇلت پلاتفورماسى 20-دان استام الدىن الا كونفيگۋراتسيالانعان IaaS جانە PaaS قىزمەتىن بىرىكتىرەدى. اتالعان سەرۆيستەردىڭ كومەگىمەن دەرەكتەردى ساقتاۋعا مۇمكىندىك ارتۋىمەن قاتار, ينفراقۇرىلىمدى ساناۋلى مينۋتتاردا ورنالاستىرۋعا بولادى.
VK Tech باسقارۋشى ديرەكتورى پاۆەل گونتارەۆتىڭ ايتۋىنشا, بۇلتتى سەرۆيستەر تسيفر ءونىمىن ازىرلەۋ مەن دامىتۋدىڭ ستاندارتىنا اينالىپ, ناتيجەسىن نارىققا شىعارۋعا جەدەلدەتۋمەن قاتار, باسەكەلەستىك ارتىقشىلىعىنا ىقپال ەتەدى. سونىمەن قاتار اقپاراتتىق تەحنولوگيالار ينفراقۇرىلىمىن قۇرۋ جانە كيبەرقاۋىپسىزدىكتى قامتاماسىز ەتۋدەن باستاپ دەرەكتەردى ساقتاۋ مەن وڭدەۋگە جانە ML مودەلدەرىمەن جۇمىس ىستەۋگە مۇمكىندىك بەرەدى.
«استاناداعى جاسىل تەحنولوگيالار بويىنشا سالىنعان QazCloud دەرەكتەر ورتالىعى VK Cloud لوكاليزاتسيالانعان پلاتفورماسى بار قازاقستاننىڭ IT ماماندارىنا بارلىق قۇرالدى قازاقستان اۋماعىندا ترانسشەكارالىق دەرەكتەرسىز, ياعني ارتىق شىعىندارسىز الۋعا كومەكتەسەدى. ويتكەنى قازىرگى كەزدە ەلىمىزدەگى كوپتەگەن كومپانيالار ءوز دەرەكتەرىن Google, Amazon, Yandex سياقتى شەتەل پلاتفورمالارىندا ساقتاۋعا ءماجبۇر. ەندىگى كەزەكتە بۇلتتىق سەرۆيستىك پلاتفورمالاردىڭ ءوز ەلىمىزدە دامۋى وتاندىق كومانيالار دەرەكتەرىنىڭ اشىقتىعى مەن قاۋىپسىزدىگىنىڭ كەپىلى بولا الادى», دەيدى QazCloud باس ديرەكتورى قاسىم ەسەرگەپوۆ.
VK Cloud بۇلت پلاتفورماسى قازاقستان نارىعىنا بەيىمدەلگەن. جەرگىلىكتى ساندىق ورتالىققا ورنالاستىرۋ «دەربەس دەرەكتەر تۋرالى» زاڭناما تالاپتارىنىڭ ساقتالۋىن, سونداي-اق قىزمەتتىڭ جوعارى جۇمىس جىلدامدىعىن قامتاماسىز ەتەدى. ال Qazcloud ينفراقۇرىلىم پروۆايدەرى IT-ينفراقۇرىلىمدى قولداۋ, قىزمەت كورسەتۋ جانە جاڭعىرتۋ, ۆيرتۋال رەسۋرستاردى جالعا الۋ جانە ورنالاستىرۋ, IT-اۋتسورسينگ, اقپارات قاۋىپسىزدىگى جانە جۇيەلەردى تەحنيكالىق تۇرعىدان سۇيەمەلدەيدى.