تۇركىستان وبلىسى ارىس قالاسىنىڭ تۇرعىنى التىن قۇتتىبايقىزىنىڭ جاسى 60-قا تاياعان. 40 جىلدان بەرى تراكتور تىزگىندەپ كەلەدى. ءالى كۇنگە دەيىن جان-جۇرەگى قالاعان كاسىبىمەن اينالىسقاندى جانى سۇيەدى, دەپ جازادى Egemen.kz otyrar.kz-كە سىلتەمە جاساپ.
التىن قۇتتىبايقىزى 1980 جىلى شىمكەنت قالاسىندا «پوشتا وپەراتورى» ماماندىعى بويىنشا ءبىلىم العان. كەيىن تاشكەنتتەگى تەحنيكۋمدا ءبىلىمىن جەتىلدىرەدى. اۋىلىنا كەلگەن سوڭ ماماندىعى بويىنشا جۇمىس تابا الماعان ول 3 ايلىق تراكتور جۇرگىزۋ كۋرسىنان وتەدى. ۇنەمى اڭسارى تراكتورعا اۋا بەرەتىن كەيىپكەرىمىز نەبارى 21 جاسىندا K-700 تراكتورىنىڭ جۇرگىزۋشىسى بولعان.
«مەن تراكتور جۇرگىزۋدى ۇيرەنىپ كەلىپ, جۇمىسىما كىرىسكەن كەزدە تراكتور ايدايتىنداردىڭ ءبارى شاعىن دەنەلى كىسىلەر بولدى. سونداي كىپ-كىشكەنتاي بولىپ, ۇلكەن تراكتوردى قالاي تىزگىندەپ ءجۇر دەپ تاڭعالاتىنمىن. سويتسەم, جۇرگىزۋ وپ-وڭاي ەكەن. مۇنىڭ اۋىر جانە جەڭىل جۇرگەن كەزدە جىلدامدىعى باسقاشا بولادى. رەجيممەن جۇرەدى. ونى مەڭگەرۋ ءۇشىن اسقان جاۋاپكەرشىلىك كەرەك. مەن باسىندا ۋايىمداعانىممەن, بارلىق ەرەجەنى تەز جاتتاپ الدىم», دەدى التىن قۇتتىبايقىزى.
كوپبالالى انا كسرو زامانىندا كۇنى-ءتۇنى سوۆحوزدىڭ جەرىن جىرتىپ ەڭبەك ەتەدى. كەيىن اۋىلداسىنا تۇرمىسقا شىققان ەكەن. اتا-ەنەسى تراكتور ايداۋىنا قارسى بولماعان. كەلىن بولىپ تۇسكەن ۇيىنە تراكتورىمەن بىرگە بارعاندىقتان, «تراكتورشى كەلىن» اتانىپتى. ءۇيدىڭ تە, ءتۇزدىڭ دە شارۋاسىن دوڭگەلەتۋدى ادەتكە اينالدىرعان. سوۆحوز تاراپ, جان-جاققا بولىنگەننەن كەيىن ءبىر تراكتور التىن اپايدىڭ جەكە ۇلەسىنە تيەدى.
ء«بىر تراكتورمەن بار بولسا, ءبىر وتباسىن اسىراۋعا بولادى. باياعىدا مۇنىڭ تابىسى جاقسى ەدى. قازىر باسقا دا اۋىر كولىكتەر شىقتى. بىراق مەنىڭ ءالى كۇنگە دەيىن تراكتور ايداعىم كەلىپ تۇرادى. سول ءۇشىن تاپسىرىس الا بەرەم. بالالارىم «قويىڭىزشى ەندى, جاسىڭ كەلدى عوي, ۇيدە وتىر» دەيدى. وندا تۇرعان ەشتەڭە جوق, ءوزىم جاقسى كورەتىن جۇمىسىممەن اينالىسىپ جۇرگەنىمدى ايتامىن. ءبىر جاعىنان جاقسى كورەتىن جۇمىسىمدى ىستەسەم, ەكىنشى جاعىنان قوسىمشا تابىس تابامىن. مۇنىڭ نەسى جامان؟ ءشوپ تە ورامىن, سۋ دا, كومىر دە تاسيمىن. قاجەتىمىزگە جاراپ تۇرعان زاتتى پايدالانۋ كەرەك قوي. سوندىقتان ەڭبەكتەنۋ كەرەك», دەدى ارىس تۇرعىنى.
التىن قۇتتىبايقىزى تراكتوردىڭ رولىنە وتىرعالى قيىن دا قىزىق ەستەلىگى كوپ بولعان. سولاردىڭ بىرىمەن ءبولىستى.
«تراكتور ايدايتىن قىزدار كوپ ەمەس قوي. مەن العاش تراكتور تىزگىندەپ جۇرگەندە جالعىز ەمەس ەدىم. قاسىمدا اقمارال دەگەن قىز بولدى. 1984 جىلى ونى كورشى اۋىلدىڭ جىگىتى الىپ قاشتى. سول كەزدە بۇل جاڭالىقتى ەستي سالا, تراكتورمەن قۋىپ بارعان ەدىم. تراكتوردىڭ ارتىندا ۇلكەن سوقاسى بار. سول سوقامەن بارعام عوي. اشۋلانىپ, توپىراق جولدى شاڭداتىپ, قۋىپ بارسام, قۇربىم «وسى بوساعادا قالامىن» دەدى. نە ىستەي الاسىڭ؟.. امال جوق, باقىت تىلەپ كەرى قايتتىم. بىراق بارعان جەرى ول قىزدى تراكتور ايداۋعا قايتا جىبەرمەي قويدى. سودان كەيىن مەن اۋىلداعى جالعىز «تراكتورشى كەلىن» اتاندىم», دەدى ول.
التىن قۇتتىبايقىزى 10 ۇل-قىزدى دۇنيەگە اكەلگەن. جولداسى دا سۇيىكتى ىسىمەن اينالىسۋىنا تىيىم سالماعان. سول ءۇشىن ومىرلىك جارىنا ايتار العىسى شەكسىز. كوپبالالى انا پوشتادا دا جۇمىس ىستەگەن. 15 جىلداي ۋاقىت اسپاز دا بولعان. ءتىپتى اۋداندىق ءماسليحات دەپۋتاتى دا بولىپ, اۋىلدىڭ تالاي ماسەلەسىن كوتەرىپ, شەشىلۋىنە ىقپال ەتكەن ەكەن. بىراق ءبارىبىر تراكتور رولىنەن باس تارتپاعان.