قازاقستاندا شاحماتتى مەكتەپ باعدارلاماسىنا فاكۋلتاتيۆتىك ءپان رەتىندە ەنگىزۋ باعدارلاماسى ازىرلەنۋدە. بولاشاقتا شاحماتتى وقىتۋدى مەكتەپالدى دايارلىقتان جوعارى وقۋ ورنىنان كەيىنگى ءبىلىم بەرۋدىڭ باسقا ساتىلارىنا دا ەنگىزۋگە بولادى. بۇل تۋرالى بۇگىن استانادا وتكەن ءباسپاسوز ءماسليحاتىندا قازاقستان شاحمات فەدەراتسياسىنىڭ (قشف) باسشىلارى مەن حالىقارالىق شاحمات فەدەراتسياسىنىڭ (FIDE) ساراپشىلارى مالىمدەدى, دەپ حابارلايدى Egemen.kz.
2016-2020 جىلدارى قشف «مەكتەپتەگى شاحمات» پيلوتتىق جوباسىن جۇزەگە اسىرعان ەدى. جوبا الماتى, قىزىلوردا, پاۆلودار وبلىستارىنداعى 18 مەكتەپتە جۇزەگە استى. ونىڭ اياسىندا 2-4 سىنىپتاردا شاحمات ساباعى وتكىزىلدى. شاحمات ويناعان مەكتەپ وقۋشىلارىنىڭ ينتەللەكتۋالدىق كورسەتكىشتەرى مەن شىعارماشىلىق قابىلەتتەرىنىڭ كۇشەيگەندىگى, الاڭداۋشىلىق دەڭگەيىنىڭ تومەندەۋى, اۋىزشا سويلەۋ جانە لوگيكالىق ويلاۋ كورسەتكىشتەرىنىڭ, ماتەماتيكا, جاراتىلىستانۋ ءپانى, گۋمانيتارلىق باعىتتار بويىنشا وقۋ ۇلگەرىمىنىڭ جاقسارعانى بايقالدى. پيلوتتىق جوبا قازاق جانە ورىس تىلدەرىندە وقيتىن 1738 وقۋشىنى قامتىدى.
سونىمەن قاتار, قازاقستان رەسپۋبليكاسىنىڭ جوعارى وقۋ ورىندارىندا شاحمات مۇعالىمدەرىن دايارلاۋ ءۇشىن «شاحماتتى وقىتۋدىڭ تەورياسى مەن ادىستەمەسى» وقۋ باعدارلاماسى ازىرلەندى. بۇل جۇمىسقا باتىس قازاقستان يننوۆاتسيالىق-تەحنولوگيالىق ۋنيۆەرسيتەتى (ورال), س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى (وسكەمەن), يننوۆاتسيالىق ەۋرازيا ۋنيۆەرسيتەتى (ينەۋ, پاۆلودار), قورقىت اتا اتىنداعى قىزىلوردا ۋنيۆەرسيتەتى قاتىستى.
«شاحماتتى مەكتەپ باعدارلاماسىنا ەنگىزۋ يدەياسى كوپتەن بەرى تالقىلانىپ كەلەدى. ءبىز مەملەكەتتىك ستاندارتتاردىڭ پايدا بولۋىن كۇتپەي-اق, جەكەمەنشىك مەكتەپتەردىڭ بۇل تاجىريبەنى قالاي قابىلداپ جاتقانىن كورىپ وتىرمىز. ءبىز مەملەكەت باسشىسىنا شاحماتتى ءبىلىم بەرۋ باعدارلاماسىنا ەنگىزۋ كەرەكتىگىن ايتىپ, ودان تولىق ساياسي قولداۋ الدىق. شاحماتتى مەكتەپ باعدارلاماسىنا فاكۋلتاتيۆتىك ءپان رەتىندە ەنگىزۋ جوسپارى ازىرلەنۋدە», دەدى قشف ءبىرىنشى ۆيتسە-پرەزيدەنتى دارمەن سادۋاقاسوۆ.
FIDE - Chess in Education كوميسسياسىنىڭ توراعاسى لەونسە گارسيا (يسپانيا) جانە كوميسسيا حاتشىسى ريتا اتكينس (ۆەنگريا) ءوز كەزەگىندە شاحماتتى وقۋ ۇدەرىسىنە ەنگىزۋدىڭ حالىقارالىق تاجىريبەسى مەن ونىڭ ناتيجەسىندە وقۋشىلاردىڭ پاندەر بويىنشا كورسەتكىشتەرى جاقسارعانىن ايتتى. ولار جالپى ءبىلىم بەرەتىن مەكتەپتەردە شاحماتتى ەنگىزۋگە مەملەكەت تاراپىنان كورسەتىلىپ جاتقان قولداۋدىڭ ماڭىزدىلىعىنا توقتالدى.