بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا «Egemen Qazaqstan» گازەتىنە بەرگەن سۇحباتىندا ايتتى, دەپ حابارلايدى Egemen.kz.
ءمينيستردىڭ ايتۋىنشا, ازاماتتاردى ناتيجەلى جانە فورمالدى جۇمىسپەن قامتۋدى ءىنتالاندىرۋ ۇشىن مەملەكەتتىك الەۋمەتتىك ساقتاندىرۋ قورىنان بەرىلەتىن الەۋمەتتىك تولەمدەردى ۇلعايتۋ قاراستىرىلادى. ياعني ەڭبەك ادامدارىن الەۋمەتتىك قورعاۋ دەڭگەيى جۇمىس ىستەمەيتىن ازاماتتارعا قاراعاندا, ەداۋىر جوعارى بولادى.
«مىسالى, جۇمىس ىستەيتىن انالار جۇكتىلىك بويىنشا دەكرەتتىك دەمالىسقا شىققانداعى 4 ايلىق تابىسىن جانە بالا ءبىر جارىم جاسقا تولعانعا دەيىنگى تولەمدى جالاقىسىنىڭ 40% كولەمىندە مەملەكەتتىك الەۋمەتتىك ساقتاندىرۋ قورىنان الىپ وتىرادى. سونداي-اق وسى ارالىقتا ونىڭ زەينەتاقى قورىنداعى شوتىنا مەملەكەت تاراپىنان زەينەتاقى جارنالارى اۋدارىلادى», دەدى مينيستر.
ال جۇمىس ىستەمەيتىن انالار بيۋدجەتتەن تەك بالا ءبىر جارىم جاسقا تولعانعا دەيىن بەرىلەتىن جاردەماقىنى الادى. ونىڭ مولشەرى بالا سانىنا بايلانىستى بولادى (2023 جىلى 19 872 تەڭگەدەن 31 705 تەڭگەگە دەيىن).