تۇركىستان وبلىسىندا جول-كولىك اپاتى سالدارىنان 3 ادام قازا تاپتى. پوليتسيا قىزمەتكەرلەرى تەرگەۋ امالدارىن جۇرگىزىلىپ جاتىر, دەپ حابارلايدى Egemen.kz polisia.kz-كە سىلتەمە جاساپ.
جول اپاتى تۇركىستان وبلىسى وتىرار اۋدانىنىڭ تورتكول-شاۋىلدەر-تۇركىستان-كەنتاۋ تاس جولىندا بولعان. Nexia ماركالى اۆتوموبيل مەن جۇك اۆتوكولىگى سوقتىعىسقانى انىقتالدى.
اپات سالدارىنان Nexia جۇرگىزۋشىسى مەن ونىڭ ەكى جولاۋشىسى وقيعا ورنىندا كوز جۇمدى. سونىمەن قاتار وسى اۆتوكولىكتىڭ ءبىر جولاۋشىسى دەنە جاراقاتتارىمەن اۋرۋحاناعا جەتكىزىلدى.
اتالعان فاكتى قر قىلمىستىق كودەكسىنىڭ 345-بابى «كولىك قۇرالدارىن باسقاراتىن ادامداردىڭ جول ءجۇرۋ نەمەسە كولىك قۇرالدارىن پايدالانۋ ەرەجەلەرىن بۇزۋى» بويىنشا تىركەلدى. ساراپتاما تاعايىندالدى, بارلىق جاعدايلار انىقتالىپ جاتىر.
ء«تارتىپ ساقشىلارى جۇرگىزۋشىلەر مەن وبلىس تۇرعىندارىن جول قوزعالىسى ەرەجەلەرى مەن جول بەلگىلەرىنىڭ تالاپتارىن ساقتاۋعا, جىلدامدىقتى اسىرماۋعا جانە ءوز ءومىرى مەن جولاۋشىلاردىڭ ءومىرىن ساقتاپ قالۋ ءۇشىن قاۋىپسىزدىك شارالارىن قاتاڭ قولدانۋعا شاقىرادى», دەدى وتىرار اۋدانى پوليتسيا ءبولىمى باستىعىنىڭ مىندەتىن اتقارۋشى مەدەت بورىبەكوۆ.