مادەنيەت جانە سپورت مينيسترلىگى دۇنيەجۇزىلىك كىتاپ كۇنىنە وراي تانىمال TikTok پلاتفورماسىمەن بىرگە #كىتاپتوك جوباسىن ىسكە قوسادى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
123 ميللياردتان استام قارالىم جيناعان #BookTok جاھاندىق چەللەندجىنەن باستاۋ العان اكتسيانىڭ ماقساتى - قازاقستان ازاماتتارىن وقۋعا, كىتاپ تۋرالى وي-پىكىرلەرىمەن بولىسۋگە جانە جاڭا اۆتورلاردى تانىپ, جاڭا ادەبيەتتەردى بىلۋگە ىنتالاندىرۋ.
#كىتاپتوك حەشتەگى بويىنشا ادەبيەت پەن كىتاپ وقۋ تاقىرىبىنا ءتۇرلى ۆيدەو تۇسىرۋگە بولادى: كىتاپ شولۋلارى مەن ۇسىنىستار, كىتاپتى تانىستىرۋ, سۇيىكتى شىعارمالارىنان ۇزىندىلەر وقۋ جانە ادەبيەتكە بايلانىستى جەكە اڭگىمەلەر, ءتىپتى كىتاپ سورەسىن جاساۋ نەمەسە كىتاپ كورمەسىن جابدىقتاۋ تۋرالى بەينەماتەريالدار دا جۇكتەلەدى. ۇزدىك ءۇش ۆيدەو اۆتورى باعالى سىيلىقتارعا يە بولادى.
جوباعا TikTok-تا تانىمال كونتەنت جاساۋشىلار مەن قازاقستاننىڭ بىرقاتار كىتاپحانالارى قىزىعۋشىلىق تانىتىپ وتىر. ماسەلەن, قر ۇلتتىق اكادەميالىق كىتاپحاناسى, س.تورايعىروۆ اتىنداعى پاۆلودار وبلىستىق امبەباپ عىلىمي كىتاپحاناسى جانە قاراعاندى وبلىستىق امبەباپ عىلىمي كىتاپحاناسى جوبادان تىس قالمادى.
«مۇنداي جوبالار ادامدارعا جاڭا كىتاپتار تۋرالى بىلۋگە جانە وزدەرىنىڭ ادەبي تالعامىمەن بولىسۋگە كومەكتەسىپ قانا قويماي, سونىمەن قاتار قازىرگى تاڭداعى وتاندىق جازۋشىلارعا جاڭا وقىرمان تابۋعا جانە كىتاپحانالارعا قىزىعۋشىلىقتى ارتتىرۋعا كومەكتەسەدى. ءبىز قازاقستاندىق TikTok پايدالانۋشىلار #كىتاپتوك-قا بەلسەندى قاتىسادى دەپ ۇمىتتەنەمىز», دەدى قر مسم رەسمي وكىلى ءمولدىر ابدۋاليەۆا.