مەملەكەت باسشىسى ۇكىمەتكە قارجىنىڭ جۇمسالۋىن باقىلايتىن قاتاڭ امال-تاسىلدەر ەنگىزۋدى تاپسىردى, دەپ حابارلايدى Egemen.kz.
پرەزيدەنتتىڭ ايتۋىنشا, ءتاريفتى وسىرۋدەن تۇسكەن قوسىمشا قارجى تەك قانا كوممۋنالدىق ينفراقۇرىلىمدى جاڭعىرتۋعا جۇمسالۋى كەرەك. سونداي-اق جاڭا قۋات كوزدەرىن ىسكە قوسۋعا جانە جۇمىسشىلاردىڭ جالاقىسىن كوتەرۋگە باعىتتالۋى قاجەت.
«مونوپوليستەردىڭ مىندەتتەرى مۇقيات ناقتىلانىپ, تولىعىمەن ورىندالۋعا ءتيىس. سوندىقتان ۇكىمەتكە قارجىنىڭ جۇمسالۋىن باقىلايتىن قاتاڭ امال-تاسىلدەر ەنگىزۋدى تاپسىرامىن. وعان تسيفرلىق باقىلاۋ جۇيەسىن دە ەنگىزۋ كەرەك. جۇرت كوممۋنالدىق قىزمەت ءۇشىن تولەگەن اقشاسى قايدا كەتىپ جاتقانىن كورىپ وتىرۋعا ءتيىس. قازىرگى زامانعى اقپاراتتىق تەحنولوگيا بۇعان تولىق مۇمكىندىك بەرەدى», دەدى پرەزيدەنت.
سونداي-اق ول جانار-جاعارمايدىڭ باعاسىن كوتەرۋ ماسەلەسى تۋرالى ءسوز ەتتى.
«تۇسكەن قارجىنى دەلدالدار, ياعني الىپساتارلار يەمدەنىپ كەتپەۋى قاجەت. ونى جاڭا مۇناي-گاز جوبالارىن جۇزەگە اسىرۋعا جانە مۇناي وڭدەۋ زاۋىتتارىن جاڭعىرتۋعا جۇمساۋ كەرەك. سوندىقتان ۇكىمەت مۇناي ونىمدەرىنىڭ باعاسىن قايتا قاراۋ كەزىندە مەملەكەتكە تولەنەتىن سالىقتى ارتتىرۋ جونىندە قوسىمشا شارالار قابىلداۋعا ءتيىس. جالپى تاريف ساياساتى بويىنشا ۇكىمەتكە تاۋارلار مەن قىزمەتتەردى رەتتەيتىن «تۇتىنۋدىڭ الەۋمەتتىك نورماسىن» ەنگىزۋ ماسەلەسىن پىسىقتاۋدى تاپسىرامىن. بۇل – حالىقارالىق تاجىريبە», دەپ قوستى مەملەكەت باسشىسى.
سونداي-اق پرەزيدەنت بارلىق قاراجات تولىعىمەن ەكونوميكانى دامىتۋعا جۇمسالۋى قاجەت ەكەنىن اتاپ ءوتتى. وسى ورايدا ول قارجىنى قايتارىپ, ەلىمىزدى وركەندەتۋگە اتسالىسقىسى كەلەتىن ازاماتتارعا قاراتا بىلاي دەدى:
«جاڭا يندۋستريالىق جوبالارعا قارجى سالىڭىزدار. قازاقستاندا جاڭا وندىرىستەر اشىپ, جاڭا جۇمىس ورىندارىن قۇرىڭىزدار. سوندا مۇنداي اكتيۆتەرگە جانە ونىڭ يەلەرىنە قاتىستى ەشقانداي ماسەلە تۋىندامايدى. تاعى دا قايتالاپ ايتامىن. ءبىز ادال ءارى اشىق جۇمىس ىستەيتىن بيزنەس وكىلدەرىنە بارلىق جاعدايدى جاسايمىز», دەدى ول.