كۇن ساۋلەسى ۇزارىپ, جەر كەڭي باستاعان كوكتەمنىڭ كەرىم ءساتى ساپ تىيىلدى دا, كۇن كۇرت سۋىتتى. جۇرت «بەسقوناق باستالدى, ءساۋىردىڭ ءوزى ءتاۋىر, 5 كۇنى اۋىر» دەستى. ارتىنشا الاسۇرا سوققان اداسقاق جەل قارلى بورانعا ۇلاسىپ, ءاپ-ادەمى دۇنيەنى ۇرشىقتاي ءۇيىرىپ اكەلىپ قاڭتاردىڭ قاق ورتاسىنا تاستاي سالعانداي بولدى.
«قازگيدرومەت» فيليالىنىڭ وكىلدەرى 14 ساۋىردە ءوڭىردىڭ وڭتۇستىك اۋداندارىندا كۇن رايى – 10 گرادۋسقا دەيىن سۋىتادى, قار ارالاس بۇرقاسىن تۇرىپ, اۆتوكولىك جولدارىن كوكتايعاق جابۋى مۇمكىن دەپ ەسكەرتكەن. 15-ىنە قاراعان ءتۇنى ارقالىق توڭىرەگىندە, جىتىقارا, قامىستى, امانگەلدى, جانگەلدين اۋداندارىندا بوران كۇشەيدى.
تابيعاتتىڭ توسىن مىنەزى, اسىرەسە, امانگەلدى اۋدانىنداعى شارۋاباستى اعايىندى ابىگەرگە سالىپ كەتتى. ماسەلەن, بۇل وڭىردەگى توتەنشە جاعداي قىزمەتكەرلەرى 17 ساۋىردە قار قۇرساۋىندا قالعان 8 ادامدى قۇتقارىپ قالعان.
«امانگەلدى اۋدانىنا قاراستى قاراسۋ اۋىلىنىڭ تۇرعىندارى ماقات اۋىلىنان بىرنەشە شاقىرىم جەردە ورنالاسقان جۇمىسشىلار قوسىنىنا ازىق-ت ۇلىك اپارا جاتىپ قارلى بوراندا قالىپ قويعان. جولدا قالعاندارعا كومەكتەسۋ ءۇشىن شىققان جۇك تيەگىش تەحنيكا دا قالىڭ قاردان وتە الماي, ومبىلاپ باتىپ قالادى. بۇل حابار اۋدان ورتالىعىنداعى ءورت ءسوندىرۋ بولىمىنە تاڭعى ساعات 6-دان وتە ءتۇستى. قۇتقارۋشىلار حابار الىسىمەن دەرەۋ جولعا اتتانىپ, ماقات اۋىلىنان 8 شاقىرىم جەردە قار قۇرساۋىنان شىعا الماي تۇرعان «نيۆا» اۆتوكولىگىن قاۋىپسىز جەرگە سۇيرەپ شىعاردى. ساعات 09:45-تە اۆتوكولىكتەگى التى ادامنىڭ ءبارى امان-ەسەن ماحات اۋىلىنا جەتكىزىلدى», دەپ مالىمدەدى وبلىستىق توتەنشە جاعداي دەپارتامەنتىنىڭ ءباسپاسوز قىزمەتى.
امانگەلدىلىك قۇتقارۋشىلار بۇدان ءبىر كۇن بۇرىن قارلى بوراندا اداسىپ كەتكەن 2 شوپاندى ىزدەپ تاۋىپ, مالشىلار قىستاۋىنا جەتكىزگەن. شوپاندار دارىگەر كومەگىنەن باس تارتىپتى.
– ء«ساۋىر بولماي, ءتاۋىر بولماس» دەيتىن قازاق ەمەسپىز بە. مالدى قىرعا شىعارىپ, ارقانى كەڭگە سالىپ جۇرگەندە تابيعات توسىن مىنەز تانىتىپ, ابىگەرگە سالعانىن قاراشى. ارقانىڭ بەسقوناعى بورانىمەن كەلىپ ابدەن ساستىردى. ىققان مالدى قايىرامىز دەپ اتقا قونعان ەكى ازامات بوراندا اداسىپ كەتكەنىن ەستىپ, امانگەلدى اۋدانىنىڭ توتەنشە جاعداي بولىمىنەن كومەك سۇراۋعا تۋرا كەلدى. ءوز ىستەرىنىڭ ناعىز ماماندارى دەرەۋ ىسكە كىرىسىپ, ايدالادا قالعان ازاماتتاردى تاۋىپ, امان-ەسەن ۇيلەرىنە جەتكىزدى. ادام ومىرىنە قاۋىپ ءتونىپ تۇرعان سىندارلى ساتتە شۇعىل شەشىم قابىلداپ, شوپانداردىڭ امان-ساۋ ورالۋىنا كومەكتەسكەن قۇتقارۋشىلار مەن ۇرپەك اۋىلدىق ۋچاسكەلىك ينسپەكتورىنا العىس ايتامىز, – دەيدى اۋىل تۇرعىنى سەرىك تولەكباەۆ.
قوستاناي وبلىسى