ولاردىڭ 89-ى اۋرۋ-سىرقاتتان, 62-ءسى جول اپاتىنان, 50 ادام سۋيتسيدتەن قايتىس بولعان. سەناتتا اسكەري قىزمەتشىلەردىڭ ءومىرى مەن دەنساۋلىعىن ساقتاۋ ماسەلەلەرى تالقىلاندى, دەپ حابارلايدى Egemen.kz.
دەپۋتاتتاردىڭ ايتۋىنشا, بىلتىر 131 مىڭنان استام بوزبالا اسكەرگە شاقىرىلسا, 13 پروتسەنتى جارامسىز ەكەنى انىقتالعان. سەناتورلار جاسوسپىرىمدەردىڭ ءتان مەن رۋح تاربيەسى قولعا الىنۋى ءتيىس دەگەن پايىم ايتتى. سەبەبى قازىرگى كەزدە مىندەتتەلگەن كۆوتانى تولتىرۋ ءۇشىن اسكەر قاتارىنا دەنساۋلىعى جوق بوزبالالار دا كەتىپ جاتىر.
«اسكەرگە شاقىرۋ كوميسسياسىنىڭ الدىنا كەلگەنشە ءار بالانىڭ بۇكىل پسيحو-فيزيكالىق پورترەتى جيناقتالۋى ءتيىس. بۇل سارالانعان اقپارات سۋيتسيدكە بارۋ, الىمجەتتىك كورسەتۋگە بەيىم ادامداردى ەرتە انىقتاپ, كوپ ماسەلەنىڭ الدىن الادى», دەدى دەپۋتاتتار.
سونداي-اق اسكەري قىزمەتشىلەردىڭ جالاقىسىن ارتتىرۋ, اسكەري جانە ازاماتتىق دارىگەرلەردىڭ جالاقىسىن تەڭەستىرۋ, تۇرعىن ءۇي ساتىپ الۋ ءۇشىن باستاپقى جارنانى تومەندەتۋ شارالارى قارالدى.