كەزىندە اعايىندى ماحمۇت, ماقسۇت وماروۆتار سپورت سۇيەر قاۋىمنىڭ ىستىق ىقىلاسىنا بولەندى. اعايىندى قوس ساڭلاق قازاق ەلى سپورتىنىڭ كوش باسىندا ءجۇردى. مىڭداعان جانكۇيەر اعايىندى وماروۆتاردىڭ بوكسىن كورۋ ءۇشىن الماتىنىڭ سپورت ارەنالارىنا قاراي لەك-لەگىمەن اعىلىپ جاتاتىن. ول كەزدە قازاقستاندا قازاقتىڭ ۇلەسى كەم. ماسكەۋدىڭ وتارشىل ساياساتىنىڭ سالدارىنان ۇلتىمىزدىڭ رۋحى جانشىلىپ, ەڭسەسى تۇسكەن ءبىر كەزەڭ ەدى. سول تۇستا, ياعني 1947 جىلى قازاق بوكسىنىڭ اتاسى شوقىر بولتەك ۇلىنىڭ قارشىعاداي عانا شاكىرتى ماحمۇت وماروۆ كسرو چەمپيوناتىنىڭ ەڭ ءبىرىنشى مەدالىن قازاقستانعا الىپ كەلدى. بۇل تاريحي جەڭىس بولاتىن. ودان كەيىن دە ورتالىق ازيا مەن قازاقستان جارىستارىندا تالاي مارتە جەڭىس تۇعىرىنا كوتەرىلدى.
كوپ ۇزاماي ماحمۇتتىڭ ءىزىن باسىپ تۋعان ءىنىسى ماقسۇت شىقتى اتويلاپ. ول سپورتتىق ناتيجە جاعىنان اعاسىنان اسىپ ءتۇستى. 1957 جىلى كسرو چەمپيوناتىنىڭ قولا مەدالىنە بولعان ماقسۇت 1959 جىلى كسرو حالىقتارى سپارتاكياداسىنىڭ كۇمىس جۇلدەگەرى اتاندى. تاريحي شەجىرەنى پاراقتاساق, اتالعان سپارتاكيادادا مەدال العان تۇڭعىش قازاق سپورتشىسى ماقسۇت وماروۆ ەكەن. ەندى قاراڭىزدار, ماحمۇت وماروۆ كسرو چەمپيوناتىنىڭ جۇلدەگەرى بولعان ەڭ العاشقى قازاقستاندىق بوكسشى بولسا, ماقسۇت وماروۆ – وداق سپارتاكياداسىندا جۇلدەگەرلەر ساپىنا كىرگەن تۇڭعىش قازاق بوكسشىسى.
ۋاقىت وزىپ بارادى. كەيىنگى جاستاردىڭ باسىم كوپشىلىگى بۇل كىسىلەردىڭ تاريحي جەڭىستەرىنەن بەيحابار. بۇعان ولار ەمەس, كوپ جاعدايدا ءبىز كىنالىمىز. سەبەبى, وسىنداي تاريحي تۇلعالاردى ناسيحاتتاۋعا, شەجىرەگە تىركەۋ جاعىنا جەتە ءمان بەرمەيمىز. ەندىگى تىلەگىمىز: قوستاناي وبلىسىنىڭ جانگەلدين اۋدانىنداعى تورعاي اۋىلىندا ورنالاسقان سپورت كەشەنىنە جەرلەستەرىمىز ماحمۇت, ماقسۇت وماروۆتاردىڭ ەسىمى بەرىلسە. اۋىلداستارى ءبىلسىن, وسى قاراشا اۋىلدان ەلگە تانىمال ەكى بىردەي دارابوزدىڭ شىققانىن. جاستار سولارعا قاراپ بوي تۇزەسىن, نامىستارىن قايراسىن, بيىك بەلەستەرگە قۇلاش سەرمەسىن.
تاريح جاڭعىرىپ تۇرادى. ۇرپاقتار ساباقتاستىعىن ساقتاۋ – ءبىزدىڭ پارىزىمىز. قازاقتىڭ ءار قيىرىنداعى تاريحي تۇلعالار حالىقتىڭ جادىنان وشپەسە دەگەن تىلەگىمىز بار. قوستاناي وبلىسىنىڭ اكىمى قۇمار اقساقالوۆ اقساقالداردىڭ ۇنىنە قۇلاق اسادى دەگەن سەنىمدەمىز.
جۇماحان سادۋاقاسوۆ,
مۇرات وسپانوۆ,
ەڭبەك ارداگەرلەرى
قوستاناي وبلىسى,
جانگەلدين اۋدانى,
تورعاي اۋىلى