قوستانايدا سۋرەتشى اڭساعان مۇستافانىڭ «سويلە, سۋرەت!» اتتى كورمەسى اشىلدى. وبلىستىق سۋرەت گاللەرەياسىنا قىلقالام شەبەرىنىڭ 60 شاقتى تۋىندىسى ىلىنگەن. اق كەنەپكە تامعان قارا بوياۋدىڭ ءبارى سويلەپ تۇر دەسە بولادى. ءار تۋىندىنىڭ ءوز ءۇنى, ءوز جۇگى بار: ءبىرى قازىرگى قوعامدى الاڭداتىپ وتىرعان سان الۋان كەلەڭسىز دۇنيەلەردى مىنەيدى, ەندى ءبىرى قوعام نازارىن بالا تاربيەسىندە كەتىپ جاتقان كەم-كەتىك ماسەلەلەردى مەڭزەيدى.
سۋرەتشىنىڭ بىرقاتار تۋىندىلارى الەۋمەتتىك جەلىلەر مەن ۇيالى تەلەفونعا تاۋەلدى بولىپ قالعان بالالارعا ارنالعان. مىسالى, ءبىر سۋرەتتە اناسىنىڭ قۇرساعىندا جاتقان بالانىڭ گادجەتكە ۇڭىلگەن قالپى بەينەلەنىپتى. ەندى ءبىر سۋرەتتە جاس انا ءسابيدىڭ ورنىنا «Facebook» بەلگىسىن قۇشاقتاپ تۇرسا, ەكىنشىسىندە سمارتفوننىڭ قۇشاعىنداعى بالا «TikTok» جەلىسىنەن ءسۇت ەمىپ جاتىر.
سۋرەتشىنىڭ بۇگىنگى قوعامنىڭ وزەكتى ماسەلەلەرىنە ارنالعان تۋىندىلارىنىڭ مازمۇنىن «اناعا حات», «بۇل كۇن قاشان بىتەدى؟», «باسقا جەردە وينا», «ۇرماشى, اكە, قورقامىن», «قۋىرشاق», «ماحاببات پا؟», «شاقىرىلعان ابونەنتپەن سويلەسۋ مۇمكىن ەمەس», «بالا ارمانى», «الىپپە», «مەنىڭ انام» دەگەن سياقتى ىقشام ءسوز تىركەستەرى اشا تۇسەدى.
مىسالى, كەشكىلىك جۇمىستان كەلىسىمەن بالاسىنا ءبىر اۋىق كوڭىل اۋدارۋدىڭ ورنىنا, تەلەديدارعا تەلمىرىپ جاتىپ الاتىن اكەلەر بار. قىلقالام شەبەرىنىڭ قولىنان شىققان الەۋمەتتىك تۋىندىلاردىڭ بىرىندە جاماۋلى ويىنشىعىن قۇشاقتاپ الىپ, «قۇداي, نەگە مەنى تەلەديدار قىلىپ جاراتپادىڭ؟ اكەم جۇمىستان كەلگەندە ماعان قارار ەدى!» دەپ جازىپ وتىرعان كىشكەنتاي قىز بالا بەينەلەنگەن. سۋرەتشى كوز الدىنداعى اكەسىنەن ءبىراۋىز جىلى ءسوز ەستي الماي, جالعىزدىق تاقسىرەتىن تارتقان ءسابي قيالىنداعى جازۋ ارقىلى بۇتىندەي قوعامعا دابىل قاققانداي كورىنەدى.
– اڭساعان مۇستافانىڭ تۋىندىلارىمەن بۇعان دەيىن دە الەۋمەتتىك جەلى ارقىلى تانىسپىن. سۋرەتشىنىڭ شىعارمالارى شىنايىلىعىمەن ەرەكشە, كوبىنە ءبىز بايقاي بەرمەيتىن, بىراق اينالامىزدا بولىپ جاتقان وزەكتى ماسەلەلەردى قوزعايدى. بۇل سۋرەتتەر اركىمگە دە وي سالىپ, بالكىم كوپ ماڭىزدى دۇنيەگە ونشا كوڭىل بولە بەرمەيتىن تالاي جانداردىڭ ءوز وتباسىنا, اكە-شەشەسىنە, بالا-شاعاسىنا دەگەن كوزقاراسىن وزگەرتۋگە ىقپال ەتۋى مۇمكىن. سوندىقتان مۇنداي تۋىندىلار كورمەدە ەمەس, كوشەلەردە تۇرۋى كەرەك, – دەيدى سۋرەت گالەرەياسىنا كەلگەن قالا تۇرعىنى مۇراتباي جۇماش.
«سويلە, سۋرەت!» كورمەسى ءبىر اي بويى جۇمىس ىستەيدى.
قوستاناي وبلىسى