ۇلتتىق ۇلاننىڭ باس قولباسشىلىعىندا قر ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى گەنەرال-مايور ەركىن بوتاقانوۆتىڭ توراعالىعىمەن اعىمداعى جىلدىڭ 1 توقسانىنداعى اسكەردەگى قىزمەتتىك-جاۋىنگەرلىك ارەكەتتىڭ قورىتىندىسى بويىنشا اسكەري كەڭەستىڭ وتىرىسى ءوتتى, دەپ حابارلايدى Egemen.kz.
اسكەري كەڭەستە اسكەرلەردىڭ 2023 جىلدىڭ ءبىرىنشى توقسانىنا قورىتىندىلار شىعارىلىپ, الداعى كەزەڭگە مىندەتتەر قويىلدى. ۇلتتىق ۇلاننىڭ باس قولباسشىسى اسكەري كەڭەستىڭ وتىرىسى بارىسىندا جاۋىنگەرلىك جانە جۇمىلدىرۋ دايىندىعىن ارتتىرۋ, جەكە قۇرامنىڭ مورالدىق-پسيحولوگيالىق جاي-كۇيىن نىعايتۋ ماسەلەلەرىنە ەرەكشە نازار اۋداردى, بۇل رەتتە بارلىق ساناتتاعى اسكەري قىزمەتشىلەردىڭ اسكەري تارتىبىنە باستى نازار اۋدارىلدى.
«كوماندير - بارىنە ۇلگى! ۆزۆود, روتا, باتالون كومانديرلەرى بارلىق جەكە قۇرام ءۇشىن تارتىپتىلىكتىڭ ۇلگىسى بولۋى كەرەك. الدىمەن كوماندير وزىنە تالاپ قويىپ, سودان كەيىن باعىنىشتىلاردان تالاپ ەتۋى كەرەك», دەپ اتاپ ءوتتى گەنەرال-مايور ەركىن بوتاقانوۆ.
اتالعان اسكەري كەڭەستە ۇلتتىق ۇلان باس قولباسشىسىنىڭ ءبىرىنشى ورىنباسارى-باس شتاب باستىعى گەنەرال-مايور قايرات اقتانوۆ, ۇلتتىق ۇلان باس قولباسشىسىنىڭ ورىنباسارى گەنەرال-مايور باۋىرجان ءابجانوۆ جانە حالىق قاھارمانى, باس قولباسشىنىڭ تاربيە جانە الەۋمەتتىك-قۇقىقتىق جۇمىس جونىندەگى ورىنباسارى پولكوۆنيك قايرات ۇمبەتوۆ بايانداما جاسادى. بايانداماشىلار ءوز سوزدەرىندە بولىمدەر مەن بولىمشەلەردىڭ قىزمەتتىك-جاۋىنگەرلىك قىزمەتىن ۇيىمداستىرۋ, كادرلاردى نىعايتۋ, اسكەري ءتارتىپ پەن قۇقىقتىق ءتارتىپتى ساقتاۋ بويىنشا وزەكتى جانە پروبلەمالىق ماسەلەلەر كوتەرىلدى.
وتىرىس بارىسىندا وڭىرلىك قولباسشىلىقتار, اكادەميا جانە اسكەري بولىمدەر قولباسشىلىعىنىڭ لاۋازىمدى تۇلعالارى تىڭدالدى, ولارعا قىزمەتتىڭ تاپسىرىلعان ۋچاسكەلەرىندە جۇمىستا كەمشىلىكتەر كورسەتىلدى.
سونداي – اق اسكەري كەڭەس بارىسىندا ەل باسشىلىعى قۇقىقتىق ءتارتىپ اسكەرلەرىنىڭ پروبلەمالىق ماسەلەلەرى بويىنشا حابارى بار ەكەنى ايتىلىپ, مەملەكەت باسشىسى مەن ىشكى ىستەر ءمينيسترىنىڭ قولداۋىمەن بۇل ماسەلەلەر كەزەڭ-كەزەڭىمەن شەشىلەتىنى اتاپ ءوتىلدى. 7 مامىر – وتان قورعاۋشىلار كۇنى ەل قارۋلى كۇشتەرىنىڭ جوعارعى باس قولباسشىسىنىڭ قاتىسۋىمەن بۇكىل ارميا كەڭەسى وتەتىنى تۋرالى اقپارات جاريالاندى.
اسكەري كەڭەس وتىرىسىنىڭ قورىتىندىسى بويىنشا باسشىلىق ەتۋ جانە ورىنداۋ ءۇشىن وڭىرلىك قولباسشىلىقتار مەن اسكەري بولىمدەرگە جىبەرىلەتىن قاۋلى قابىلداندى.
ايتا كەتەيىك, 2023 جىلدىڭ ءبىرىنشى جارتىجىلدىعىنىڭ قورىتىندىسى بويىنشا اسكەري كەڭەستىڭ كەلەسى وتىرىسى قاراعاندى قالاسىندا وتەدى.