«استانا وپەرا» تەاترىنىڭ ساحناسىندا «راحمانينوۆ تريبيۋت» فەستيۆالى اياسىندا س.ءراحمانينوۆتىڭ «الەكو» وپەراسىنىڭ كونتسەرتتىك ورىنداۋىنىڭ پرەمەراسى ءوتتى.
ديريجەر, جوبا اۆتورى ابزال ءمۇحيتديننىڭ جەتەكشىلىگىندەگى وركەستردىڭ, قازاقستاننىڭ ەڭبەك سىڭىرگەن ءارتىسى يۋري كولچيننىڭ جەتەكشىلىگىندەگى سولتۇستىك قازاقستان وبلىستىق فيلارمونياسى حور ارتىستەرىنىڭ, سوليستەردىڭ شابىتتى ونەر كورسەتۋى كونتسەرتتىك ورىنداۋدى ارلەندىرە ءتۇستى. سونداي-اق وعان تاپقىرلىقپەن جاسالعان ستسەنوگرافيالىق دۇنيەلەر كورىك بەردى.
ءراحمانينوۆتىڭ مۋزىكاسى كەيىپكەر مىنەزدەرىمەن بىرگە ويناپ, وزەن جاعاسىندا جايىلعان سىعاندار تابورىنىڭ كوركەم سۋرەتىن كوز الدىڭا اكەلەدى. اۋەزدى اۋەندە بارشامىزعا تانىس ماحاببات, قىزعانىش, ىشكى ۇرەي مەن قايعىلى قازا سارىنى ەستىلەدى.
باستى كەيىپكەرلەردى «Astana Opera» سوليستەرى, «Astana Opera» حالىقارالىق وپەرا اكادەمياسىنىڭ شاكىرتتەرى مەن «گەليكون وپەرا» جاستار وپەرا باعدارلاماسىنىڭ سوليستەرى سومدادى. اتاپ ايتساق, دىنمۇحامەد كوشكىنباەۆ پەن ۆاسيلي ۋپوروۆ جاس تا ءوزىمشىل الەكونىڭ باستى پارتياسىن ورىندادى. باستى كەيىپكەردىڭ وپەرا ونەرىنىڭ ۇزدىك تۋىندىلارىنا جاتاتىن «تابوردىڭ بارلىعى ۇيقىدا» كاۆاتيناسى ولاردىڭ ورىنداۋىندا اسەرلى شىرقالدى.
– مەنىڭ كەيىپكەرىم جالعىزدىقتان قينالىپ, مەيىرىم مەن جىلۋلىق ىزدەيدى, الايدا ونىڭ باقىتتى وتباسىلىق ءومىر جايلى ارماندارى ورىندالمايدى. ول زەمفيرانى ولەردەي قىزعانادى. بۇل سەزىم بويىن تۇگەلدەي بيلەپ, ساناسىن تورلاپ تاستاعان. سول سەبەپتى الەكو وزىنە ادال بولا الماعان سۇيىكتىسىن ولتىرەدى. وسى تۋىندىداعى بارلىق ەموتسيا بوياۋىن اۋديتورياعا جەتكىزۋ ءۇشىن ءبىز ديريجەر – ماەسترو ابزال مۇحيتدينمەن ۇلكەن جۇمىس اتقاردىق. دايىندىق بارىسىندا وپەرانىڭ قالاي جازىلعانى جايلى كوپتەگەن دەرەكتى ءبىلىپ, كەيىپكەرلەردىڭ مۋزىكالىق بەينەلەرىن اشتىق. ءوز تەاترىمىزداعى پرەمەرادا «الەكونى» ورىنداۋ – مەن ءۇشىن زور مارتەبە, – دەدى دىنمۇحامەد كوشكىنباەۆ.
قارت سىعاندى شىڭعىس راسىلحان مەن يليا ماركوۆ تانىستىردى. جاس سىعان پارتياسىندا قوڭىر داۋىستى تەنورلار نارۇل تويكەنوۆ پەن ۆلاديسلاۆ چيجوۆ ونەر كورسەتتى. زەمفيرا سۇلۋدى گالينا چەپلاكوۆا مەن قازاقستاننىڭ ەڭبەك سىڭىرگەن قايراتكەرى ايگۇل نيازوۆا سومداسا, قارت سىعان ايەلىنىڭ پارتياسىندا تاتيانا ۆيتسينسكايا مەن گۇلجانات ساپاقوۆا ساحناعا شىقتى.
مانەرلەپ وقۋشى – قازاقستاننىڭ ەڭبەك سىڭىرگەن قايراتكەرى, قىرعىزستاننىڭ حالىق ءارتىسى, ەلورداداعى م.گوركي اتىنداعى دراما تەاتردىڭ رەجيسسەرى سەرگەي ماتۆەەۆتى ەرەكشە اتاپ وتكىمىز كەلەدى. ونىڭ وقۋىنىڭ ناتيجەسىندە كونتسەرتتىك ورىنداۋداعى وپەرا 19 جاستاعى راحمانينوۆ 17 كۇننىڭ ىشىندە جازعان كلاسسيكالىق كۇيىندە ۇسىنىلدى.