ماڭعىستاۋ وبلىستىق پەريناتالدىق ورتالىعى Facebook پاراقشاسىندا پەرزەنتحاناعا بالانى شىعارىپ الۋعا كەلگەندە شوۋ-باعدارلاما جاساپ, ءتۇرلى انيماتورلاردى جالداماۋعا ءوتىنىش جاسادى, دەپ حابارلايدى Egemen.kz.
«قازىرگى تاڭدا ماڭعىستاۋ وبلىستىق پەريناتالدىق ورتالىعى عيماراتىنىڭ الدىندا سابيلەردى ۇيگە شىعارۋ شاراسى شوۋعا اينالدى دەسەك بولادى. كۇندە ساعات 14:00-دەن باستاپ جۇمىس اياعىنا دەيىن ورتالىق الدى تويداعىداي ۋ-شۋ, قىپ قىزىل بي, قىمبات كولىكتەر, شوۋ باعدارلامالار, ءتۇرلى انيماتورلارعا تولىپ, تۋما-تۋىس, دوس-جاران كىشىگىرىم توي جاسايدى. قانشا ەسكەرتسەك تە قاراپايىم حالىق تا, انيماتورلار دا تۇسىنەر ەمەس. تۇرعىندار جاڭا بوسانعان انا مەن ءومىر ەسىگىن اشقانىنا ءبىر جەتى دە تولماعان سابيگە ەرەكشە كۇتىم مەن تىنىشتىق كەرەك ەكەنىن بىلە تۇرا, بايان, دومبىرا, انشىلەردى, انيماتورلاردى جالداپ, درون ۇشىرىپ, ولەڭ ايتىپ, كونتسەرت ۇيىمداستىرۋدى ۇيرەنشىكتى ادەتكە اينالدىرىپ وتىر», دەلىنگەن حابارلامدا.
بۇل رەتتە ورتالىق قىزمەتكەرلەرى «بۇل - ەڭ الدىمەن مەديتسينالىق مەكەمە» ەكەنىن ءتۇسىندىرىپ ءوتتى.
«ەڭ الدىمەن, ءبىزدىڭ ورتالىق – مەديتسينالىق مەكەمە. مۇندا تەك قۋانىش قانا ەمەس, باسقا دا جاعدايلار بولىپ جاتادى. ءبىر انالار ءسابيىن قۇشاعىنا الىپ قۋانىپ جاتسا, كەيبىرى جانساقتاۋ بولىمىندە ءومىر ءۇشىن كۇرەسىپ جاتادى. اسىرەسە, وتە از 500,0 -700,0 گر سالماقپەن دۇنيە ەسىگىن اشىپ, 2-3 اي بويىنا ارنايى قۇرىلعىلارعا قوسىلىپ, وڭالتۋدان ءوتىپ جاتقان سابيلەرگە تىنىشتىق اسا قاجەت. مۋزىكانىڭ ءۇنى داۋىس كۇشەيتكىشى ارقىلى قاتتى شىعادى جانە ول بارلىق بولىمدەرگە انىق ەستىلەدى», دەپ جازدى ماڭعىستاۋ وبلىستىق پەريناتالدىق ورتالىق.
سونداي-اق مۇنداي شۋلى جاعداي مەديتسينا قىزمەتكەرلەرىنىڭ دە جۇمىسىنا كەدەرگى كەلتىرەتىنى اتاپ ءوتىلدى.
«پەرزەنتحانانىڭ الدىندا توي-دۋمان ۇيىمداستىرماي, شىعارۋعا 2-3 جاقىن ادامدارى كەلىپ, پەرزەنتحانادان شىعارىپ السا قۇبا-قۇپ بولار ەدى», دەدى ورتالىق قىزمەتكەرلەرى.