ءال-فارابي اتىنداعى قازۇۋ-دا جۋرناليستيكا تاريحى مەن عىلىمي مەكتەپتەرىنىڭ نەگىزىن قالاعان ۇستاز-عالىمدار – قايىرجان بەكحوجين, تەمىربەك قوجاكەەۆ, مارات بارمانقۇلوۆ وقۋلارى ءوتتى, دەپ جازادى Egemen.kz.
عالىمداردىڭ شىعارماشىلىق مۇراسىن زەرتتەۋگە ارنالعان شاراعا جۋرناليستيكا فاكۋلتەتىنىڭ عالىمدارى كلارا قابىلعازينا, مەدەۋبەك ساعاتبەك, عاليا يبراەۆا, ساۋلە بارلىباەۆا, ءامىرحان مولدابەكوۆ قاتىسىپ, ەستەلىكتەرىن ايتتى.
«تەمىربەك قوجاكەەۆ, مارات بارمانقۇلوۆ, قايىرجان بەكحوجين سياقتى قازاق جۋرناليستيكاسىنىڭ كوريفەيلەرىنەن ءدارىس الىپ, كەيىننەن ارىپتەس بولعانىمدى ءومىر بويى ماقتانىش ەتۋدەن تانعان ەمەسپىن. ويتكەنى ادامگەرشىلىكتىڭ بيىگىندە, عىلىمنىڭ شىڭىندا تانىلعان قازاق ازاماتتارىنىڭ ءومىر جولى ۇلتىمىزعا ۇلاعات. عالىمدار قۇرمەتىنە ارنالعان بايقاۋ ۋنيۆەرسيتەتتە جىلدا ءوتىپ كەلەدى. بايقاۋ عالىمداردىڭ شىعارماشىلىعىن, ەڭبەكتەرىن تانىپ, ءبىلۋ ءۇشىن, جۋرناليستيكانىڭ عىلىمي تۇجىرىمداماسى نەگىزدەرىن باعامداۋ ءۇشىن شاكىرتتەرگە تيگىزەتىن پايداسى مول», دەپ اتاپ ءوتتى جۋرناليستيكا فاكۋلتەتى ءباسپاسوز جانە ەلەكتروندى باق كافەدراسىنىڭ دوتسەنتى كلارا قابىلعازينا.
«ۇستازدى ۇلىقتاۋدىڭ, ۇرپاق ساناسىنا ۇلاعاتىن ۇيالاتۋدىڭ وزىق ۇلگىسى جۋرناليستيكا فاكۋلتەتىندە ۇزدىكسىز جالعاسىپ كەلەدى. ۇلتتىق جۋرناليستيكانىڭ مايتالماندارىن تاربيەلەگەن قايىرجان بەكحوجين, تەمىربەك قوجەكەەۆ, مارات بارمانقۇلوۆ وقۋلارى ارقىلى شاكىرتتەردىڭ كاسىبي ماشىعىن جەتىلدىرۋ, قۇزىرەتتىلىگىن ارتتىرۋ شىن مانىندە ۇلاعاتتى ءىس. تالاي دارىندىلاردىڭ تۇساۋىن كەسكەن, بولاشاعىنا جول اشقان بۇل وقۋلاردىڭ رەسپۋبليكالىق اۋقىمدا ءوتىپ جاتقانى قۋانتادى», دەپ اتاپ ءوتتى جيىن بارىسىندا جۋرناليستيكا فاكۋلتەتى ءباسپاسوز جانە ەلەكتروندى باق كافەدراسىنىڭ دوتسەنتى ساعاتبەك مەدەۋبەك.
جاس عالىمداردىڭ جۋرناليستيكا وقۋلارى عىلىم مەن بىلىمگە, ونەگە مەن تاربيەگە باۋلۋدا ىقپالدى دا, تانىمدىق شاراعا اينالۋدا. وسى ورايدا ستۋدەنتتەر مەن جاس عالىمدارعا ارنالعان بايقاۋدىڭ ناتيجەسى بويىنشا جەڭىمپازدار ديپلومدارمەن ماراپاتتالىپ, ۇزدىك جۇمىستارعا ءبىر رەتتىك ارنايى شاكىرتاقى تاعايىندالدى.
جەڭىمپازدار قاتارىنان تابىلعان 1-كۋرس ستۋدەنتى ايگەرىم ەسىمحان عالىم-ۇستاز تەمىربەك قوجاكەەۆتى زەرتتەۋدىڭ ءوزى ۇلكەن مارتەبە ەكەنىن جەتكىزىپ, ۇستازدىڭ ادىلدىگى مەن تالاپشىلدىعىنا ءتانتى بولعانىن ايتادى.
عىلىم جولىندا وراسان زور ەڭبەك سىڭىرگەن ۇستاز ەڭبەگىن زەرتتەۋ ءارى قاراي دا جالعاسىن تابا بەرەدى. ءىس-شاراعا «Qazaqstan» ۇلتتىق ارناسىنىڭ ارداگەرى جۇماش كەنەباي, AbaiTV ارناسىنىڭ باس پروديۋسەرى جاڭىلحان اسىلبەكوۆا, «Qazcontent» اق باسقارما توراعاسى بەكزات ءجۇسىپ, «Samruk Kazyna Trust» قورى كورپوراتيۆتىك دەپارتامەنتىنىڭ باسشىسى ميراس مۇقاش قاتىسىپ, جەڭىمپازداردى قۇتتىقتادى.