«قازاقستاننىڭ حالىق ءارتىسى» قۇرمەتتى اتاعىنا يە مادەنيەت قىزمەتكەرلەرىنە تولەنەتىن ۇستەمەاقى مولشەرى ەكى ەسە ۇلعايادى. ەندى بۇل ماراپات يەلەرىنە بازالىق لاۋازىمدىق ەڭبەكاقىنىڭ 100% مولشەرىندە ۇستەمەاقى تولەنەدى. قاۋلى جوباسى جۋىردا وتكەن ۇكىمەت وتىرىسىندا بەكىتىلدى.
مەملەكەت باسشىسى قاسىم-جومارت توقاەۆتىڭ تاپسىرماسىمەن بيىلدان باستاپ «قازاقستاننىڭ حالىق ءارتىسى» اتاعى قايتا بەرىلەتىن بولعان ەدى. قۇرمەتتى اتاققا لايىق مادەنيەت قايراتكەرلەرى رەسپۋبليكا كۇنى قارساڭىندا ماراپاتتالادى.
ايتۋلى ماراپات ەلىمىزدىڭ تەاتر, تسيرك, مۋزىكا جانە كينو ونەرىن دامىتۋعا ەرەكشە ۇلەس قوسقان, وسىعان دەيىن «قازاقستاننىڭ ەڭبەك سىڭىرگەن ءارتىسى» نەمەسە «قازاقستاننىڭ ەڭبەك سىڭىرگەن قايراتكەرى» اتاعىنا يە بولعان مادەنيەت قىزمەتكەرلەرىنە بەرىلەدى.
«قازاقستاننىڭ حالىق ءارتىسى» اتاعىن قايتا تاعايىنداۋ مەملەكەت تاراپىنان ونەر قايراتكەرلەرىنىڭ ەڭبەگىن باعالاۋعا, كاسىبي قاسيەتتەرىن دامىتىپ, جەتىلدىرۋگە, كاسىبي شەبەرلىك دەڭگەيىن ارتتىرىپ, جاڭا ونەر تۋىندىلارىن جاساۋعا ىنتالاندىرۋعا ىقپال ەتەدى. سونداي-اق جاس بۋىننىڭ شىعارماشىلىق جاعىنان وسۋىنە, ۇرپاقتار ساباقتاستىعىنا قىزىعۋشىلىق ارتتىرۋعا ۇلەس قوسادى», دەدى مادەنيەت جانە سپورت ءمينيسترى اسحات ورالوۆ.