پرەمەر-مينيستر ءاليحان سمايىلوۆ مەملەكەت باسشىسىنىڭ وتاندىق عىلىمدى دامىتۋ جونىندەگى تاپسىرمالارىن جۇزەگە اسىرۋ بارىسى تۋرالى ءسوز سويلەدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەمەر-مينيستر ءاليحان سمايىلوۆ وتاندىق عىلىمدى دامىتۋ ماقساتىندا اتقارىلعان ىستەر مەن الداعى جوسپارلار تۋرالى ايتىپ بەردى.
2020 جىلى عىلىمدى قارجىلاندىرۋعا 89 ميلليارد تەڭگە بولىنسە, بيىل ونىڭ كولەمى 160 ميلليارد تەڭگەگە دەيىن ۇلعايتىلدى. 2025 جىلعا قاراي قارجىلاندىرۋ كولەمىن 240 ميلليارد تەڭگەگە دەيىن ارتتىرۋ جوسپارلانىپ وتىر. عالىمداردىڭ جالاقىسى بىلتىر ەكى ەسە ءوستى. بيىل 20 پايىزعا كوبەيدى, الداعى جىلدارى – تاعى 20 پايىزعا ارتادى. گرانتتار كونكۋرسىنىڭ قورىتىندىسىنا قاراماستان, بازالىق قارجىلاندىرۋ اياسىندا 700 عالىم جالاقىمەن قامتاماسىز ەتىلدى. ىرگەلى عىلىمعا قاراجات گرانتتار كونكۋرستان تىس بولىنەدى. ۇلتتىق عىلىمي كەڭەستەر شەشىمدەرىنىڭ وبەكتيۆتىلىگى ارتا ءتۇستى, اپەللياتسيالىق كوميسسيا قۇرىلدى. قازاقستاننىڭ عالىمدارى جىل سايىن الەمنىڭ جەتەكشى عىلىمي ورتالىقتارىنا تاعىلىمدامادان وتۋگە جىبەرىلەدى. جاس عالىمدارعا 1000 گرانتقا دەيىن بولىنەدى. 2020 جىلى 40 جاسقا دەيىنگى جاس عالىمداردىڭ ۇلەسى 38 پايىز بولسا, بۇگىندە بۇل كورسەتكىش 46 پايىزعا جەتتى. جوبالاردى كوممەرتسيالاندىرۋ ۇلەسى 27 پايىزعا ارتتى. قازاقستان رەسپۋبليكاسىنىڭ پرەزيدەنتى جانىنداعى ۇلتتىق عىلىم اكادەمياسىنىڭ مارتەبەسى جوعارىلادى. 2029 جىلعا دەيىن عالىمداردىڭ سانىن 1,5 ەسە ارتتىرۋ جوسپارلانىپ وتىر.