بۇگىن باس پروكۋروردىڭ ورىنباسارى جاندوس ومىراليەۆ ءماجىلىس كۋلۋارىندا جاڭاوزەننەن كەلگەن بەس مۇنايشى استانادا ەرەۋىل ۇيىمداستىرعانى ءۇشىن اكىمشىلىك جاۋاپكەرشىلىككە تارتىلعانىن مالىمدەدى, دەپ حابارلايدى Egemen.kz zakon.kz سايتىنا سىلتەمە جاساپ.
ول اكىمدىكتىڭ, پروكۋراتۋرانىڭ بەيبىت جينالىستار وتكىزۋ ەرەجەلەرى تۋرالى تۇسىندىرۋلەرىنە قاراماستان, مۇنايشىلار تاراي قويماعانىن اتاپ ءوتتى. ونىڭ ايتۋىنشا, پوليتسياعا بارلىعى 120-126-داي ادام جەتكىزىلگەن.
«بۇل ماسەلەنى شەشۋ ءۇشىن «قازمۇنايگاز», سونداي-اق ەنەرگەتيكا مينيسترلىگىنىڭ باسشىلىق قۇرامى وسى جۇمىسشىلارمەن كەزدەسۋ وتكىزدى. ولارعا تۇسىندىرمە جۇمىستارىن جۇرگىزدى. ءدال بۇرىنعى ەڭبەك جاعدايى جانە ءدال بۇرىنعى جالاقىسىن ساقتاي وتىرىپ ماڭعىستاۋداعى باسقا كومپانيالارعا جۇمىسقا كىرگىزۋ ۇسىنىلدى. دەگەنمەن ەرەۋىلگە قاتىسۋشىلار ول ۇسىنىستى قابىلدامادى. ايتا كەتەرلىگى, جيىن وتكىزۋ ءتارتىبى بۇزىلدى. «بەيبىت جينالىستاردى وتكىزۋ تۋرالى» قر زاڭىنا سايكەس, مۇنداي جينالىستار حابارلاۋ ارقىلى وتكىزىلەدى, ياعني جەرگىلىكتى اتقارۋشى ورگاندارىن ءتيىستى بەلگىلەگەن جەردە بەس كۇن بۇرىن الدىن الا حاباردار ەتۋ قاجەت. بىراق كومپانيا جۇمىسشىلارى تاراپىنان مۇنداي حابارلاما جولدانباعان. سول سەبەپتى پروكۋراتۋرا ورگاندارى جەرگىلىكتى اتقارۋشى ورگاندارمەن بىرگە بۇل جۇمىسشىلارعا وسى زاڭنىڭ تالاپتارىنىڭ ساقتالۋىن بىرنەشە مارتە ءتۇسىندىردى, ءتيىستى حابارلاما بەرۋدى سۇرادى جانە ونى ساقتاماعان جاعدايدا زاڭسىز ەرەۋىل وتكىزىلىپ جاتقان جەردى بوساتۋدى ۇسىندىق. دەگەنمەن زاڭ تالاپتارى ساقتالماي, زاڭسىز جينالىس جالعاسا بەردى», دەدى جاندوس ومىراليەۆ.
ول وسى سەبەپتى قوعامدىق ءتارتىپتى ساقتاۋ ماقساتىندا جانە اكىمشىلىك قۇقىق بۇزۋشىلىقتىڭ الدىن الۋ ماقساتىندا جينالىسقا قاتىسۋشىلار ىشكى ىستەر ورگاندارىنا جەتكىزىلگەنىن اتاپ ءوتتى. «ونىڭ ناتيجەسىمەن ءتيىستى پروفيلاكتيكالىق جۇمىس جۇرگىزىلدى. بارلىق جۇمىسشى قايتارىلدى. بىراق ىشىندە ايرىقشا بەلسەندىلىك كورسەتكەن بەس ازاماتقا قاتىستى ءتيىستى اكىمشىلىك ءىس قوزعالىپ, ولارعا ەسكەرتۋ تارتىبىندە شارا قولدانىلدى. دەگەنمەن ولار دا ۇيىنە قايتارىلدى», دەدى ج. ومىراليەۆ. ەسكە سالا كەتەيىك, 10 ساۋىردە 60-70 مۇنايشى ەنەرگەتيكا مينيسترلىگى عيماراتىنىڭ ماڭىندا نارازىلىققا شىققان بولاتىن. الايدا جۇمىسشىلار بەيبىت جيىن تالاپتارىن بۇزعانى ۇشىن ۇستالعان ەدى. وسىدان كەيىن جۇمىسشىلاردىڭ تالابى تەندر تالابىمەن ساي كەلمەيتىنى تۋرالى ا. كولگىنوۆ پىكىر بىلدىردى. جاڭاوزەن اكىمى دە تۇرعىندارعا ۇندەۋ جاسادى. ال مۇنايشىلاردىڭ تالاپتارىنا قاتىستى ەنەرگەتيكا مينيسترلىگى تۇسىنىكتەمە بەرگەن. ۆەدومستۆو بۇل ماسەلە ەڭبەك زاڭناماسى مەن «سامۇرىق-قازىنا» ۇاق» اق ساتىپ الۋ قاعيدالارىن ەسكەرە وتىرىپ, زاڭنامالىق نەگىزدە شەشىلۋى ءتيىس دەپ سانايتىنىن ايتقان. بۇگىن جاڭاوزەن مۇنايشىلارى كەلىسىمگە كەلدى.