جاڭاوزەن مۇنايشىلارى كەلىسىمگە كەلدى

«بەرالى ماڭعىستاۋ Company» كومپانياسىنىڭ بۇرىنعى قىزمەتكەرلەرى قاماۋدان بوساتىلىپ, پويىزبەن جاڭاوزەن قالاسىنا اتتاندى. بۇل تۋرالى «قازمۇنايگاز» كومپانياسى ءمالىم ەتتى.

ەسكە سالا كەتەيىك, 10 ساۋىردە 60-70 مۇنايشى ەنەرگەتيكا مينيسترلىگى عيماراتىنىڭ ماڭىندا نارازىلىققا شىققان بولاتىن. الايدا جۇمىسشىلار بەيبىت جيىن تالاپتارىن بۇزعانى ءۇشىن ۇستالعان ەدى. وسىدان كەيىن جۇمىسشىلاردىڭ تالابى تەندەر تالابىمەن ساي كەلمەيتىنى تۋرالى پرەمەر-ءمينيستردىڭ ورىنباسارى التاي كولگىنوۆ پىكىر ءبىلدىردى. جاڭاوزەن قالاسىنىڭ اكىمى ايبەك قوسۋاقوۆ تۇرعىندارعا ۇندەۋ جاسادى.

ال مۇنايشىلاردىڭ تالاپتارىنا قاتىستى ەنەرگەتيكا مينيسترلىگى تۇسىنىكتەمە بەرگەن. ۆەدومستۆو بۇل ماسەلە ەڭبەك زاڭناماسى مەن «سامۇرىق-قازىنا» ۇاق» اق ساتىپ الۋ قاعيدالارىن ەسكەرە وتىرىپ, زاڭنامالىق نەگىزدە شەشىلۋى ءتيىس دەپ سانايتىنىن ايتقان.

«قمگ بايلانىس توبى مەن «بەرالى ماڭعىستاۋ Company» وكىلدەرى ارنايى جۇمىس كوميسسياسىن قۇرۋ تۋرالى كەلىسىمگە كەلدى.

ول كوميسسيا «بەرالى ماڭعىستاۋ Company» كومپانياسىنىڭ بۇرىنعى قىزمەتكەرلەرىنىڭ تالاپتارىن زاڭ اياسىندا شەشۋ ءۇشىن قاراستىرادى. كوميسسيا قۇرامىنا «بەرالى ماڭعىستاۋ Company» كومپانياسىنىڭ بۇرىنعى قىزمەتكەرلەرىنىڭ 10 ادامى كىرەدى.

«قۇقىق قورعاۋ ورگاندارى ۇستاعان قالعان مۇنايشىلار بوساتىلىپ, استانا ۋاقىتى بويىنشا 8:57-دە پويىزبەن جاڭاوزەن قالاسىنا كەتتى»,  دەپ اتاپ ءوتتى كومپانيادان.

مۇنايشىلار دا استانانىڭ تەمىرجول ۆوكزالىنان ۆيدەوۇندەۋ جاساپ, وزدەرىنىڭ ءدىن-امان ەكەندىكتەرىن ايتتى جانە قولداۋ بىلدىرگەن جەرلەستەرىنە ريزاشىلىعىن ءبىلدىردى.