ماڭعىستاۋ وبلىسىنىڭ اكىمى نۇرلان نوعاەۆ ءوڭىر تۇرعىندارىنا ۇندەۋ جاسادى, دەپ حابارلايدى Egemen.kz.
ءوڭىر باسشىسى وبلىس تۇرعىندارىن تىنىشتىق ساقتاۋعا شاقىردى.
«قۇرمەتتى ماڭعىستاۋلىقتار! قادىرلى جەرلەستەر! بۇل جاعداي بارشامىزدىڭ كوڭىلىمىزگە قاياۋ ءتۇسىرىپ وتىرعانى جاسىرىن ەمەس. وسى ساتتە ءبىز اشۋ ۇستىندە اسىعىس شەشىم قابىلداماي, سابىر ساقتاعانىمىز ءجون. ءبىز كەز كەلگەن تۇيتكىلدى ماسەلە مەن قيىندىقتاردى اقىلمەن شەشىپ, ابىرويمەن الىپ كەلەمىز. قوعامداعى شيەلەنىستى ودان ءارى ۋشىقتىرۋ, زاڭ مەن قۇقىقتىق نورمالاردى بۇزۋ - بۇل جاعدايدىڭ تۇراقسىزدانۋىنا اكەلەدى, ماسەلەنى شەشپەيدى. ارداقتى اعايىن! بارشاڭىزدى سابىر ساقتاپ, ەل تىنىشتىعىن بۇزباۋعا شاقىرامىن! ءبىز بۇل جاعدايدىڭ تەك زاڭ شەڭبەرىندە ءادىل شەشىلگەنىن قالايمىز. بارشامىزدىڭ ماقساتىمىز ءبىر - ەرتەڭگى كۇنگە دەگەن سەنىمدىلىك پەن ەلدىڭ اماندىعى, جۇرتتىڭ تىنىشتىعى. قازىر اسىرەسە ارانداتۋشىلارعا ەرىپ كەتپەي, ولاردىڭ ەل ىشىنە ىرىتكى سالىپ, تىنىشتىقتى بۇزۋىنا جول بەرمەۋىمىز قاجەت. ءبارىمىزدىڭ ماقساتىمىز ءبىر. حالقىمىز ادال ەڭبەك ەتىپ, اتقارعان جۇمىسىنا ساي ەڭبەكاقىسىن الىپ, ەرتەڭىنە سەنىممەن قاراپ, سىيلاستىقتا ءومىر ءسۇرۋدى قالايمىز جانە ونى جۇزەگە اسىرۋ ءۇشىن جۇمىس ىستەپ جاتىرمىز», دەدى ن.نوعاەۆ.
بۇدان سوڭ ول وسىعان دەيىن حالىقتىڭ تالاي سىن-ساعاتتاردان وتكەنىن ەسكە سالدى.
«بۇل تۇيتكىلدى دە اۋىزبىرشىلىكپەن, ىنتىماقپەن ەڭسەرەمىز دەپ سەنەمىن. حالقىمىز تىنىش, ەل ىرگەسى ءبۇتىن بولسىن!», دەدى نۇرلان نوعاەۆ.
ەسكە سالايىق, 10 ساۋىردە جاڭاوزەننەن استاناعا «قازمۇنايگاز» بەن «وزەنمۇنايگازعا» قىزمەت كورسەتەتىن «بەرالى ماڭعىستاۋ Company» كاسىپورنىندا جۇمىس ىستەگەن 60-70-كە جۋىق قىزمەتكەر بارىپ, ەنەرگەتيكا مينيسترلىگى عيماراتىنىڭ ماڭىندا تالاپتارىن ايتتى. ولار جۇمىستان قىسقارىپ قالعان. ويتكەنى «قازمۇنايگاز» ۇيىمداستىرعان تەندەردە «بەرالى ماڭعىستاۋ Company» جەڭىلىپ, «كەزبي» جانە Ai-Bis كومپانيالارى جەڭگەن. «قازمۇنايگاز» كومپانياسى جۇمىسشىلارعا تەندەردى جەڭگەن ەكى كومپانيادان جۇمىس ۇسىنعان. الايدا نارازىلار بۇل ۇسىنىسقا كەلىسپەي, «توعىز ايدان سوڭ تاعى تەندەر ءوتىپ, تاعى دا جۇمىسسىز قالامىز, بىزگە تۇراقتى جۇمىس كەرەك» دەگەن ەدى.
11 ساۋىردە استانا پوليتسياسى ەرەۋىلگە قاتىسۋشىلاردى ۇستاپ, پوليتسيا بولىمشەسىنە جەتكىزگەن.
الەۋمەتتىك جەلىدە ەنەرگەتيكا مينيسترلىگى عيماراتىنىڭ ماڭىندا ءبىر تاۋلىك بويى نارازىلىق ءبىلدىرىپ, تۇنەپ شىققان جۇمىسشىلاردى ارنايى جاساق اۋەلى كەتتلينگ ادىسىمەن قورشاپ, كەيىن ۇستاپ جاتقان ءساتى تۇسىرىلگەن ۆيدەو تارادى.