مەملەكەت باسشىسى قاسىم-جومارت توقاەۆ پەن ازەربايجان پرەزيدەنتى يلحام اليەۆ استانانىڭ ورتالىعىنداعى گەيدار اليەۆ اتىنداعى كوشەنى سالتاناتتى تۇردە اشتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت كوشەنىڭ سالتاناتتى اشىلۋىندا بۇل ازەربايجان حالقىنا كورسەتكەن قۇرمەتىمىز دەپ اتاپ ءوتتى.
«گەيدار اليەۆ سەكىلدى الەمدىك دەڭگەيدەگى تۇلعانىڭ اتىن ۇلىقتاۋ – ءبىزدىڭ پارىزىمىز. استانادا ونىڭ ەسىمىمەن اتالعان جاڭا كوشەنىڭ اشىلۋى – ءبىزدىڭ وسى يگى ىسكە قوسقان ماڭىزدى ۇلەسىمىز. ازەربايجان حالقىنىڭ ۇلى پەرزەنتىنە دەگەن زور ءىلتيپاتىمىز ءارى شىنايى قۇرمەتىمىز», دەدى قاسىم-جومارت توقاەۆ.
سونىمەن قاتار گەيدار اليەۆتىڭ ساياسي تۇلعاسىنا توقتالىپ, ازەربايجان مەملەكەتىنىڭ برەندىنە اينالعانىن ايتتى.
«گەيدار» ەسىمى «الدىڭعى شەپتە ءجۇرۋشى» دەگەن ماعىنا بەرەدى. مۇنىڭ سيمۆولدىق ءمانى بار. ونى قازىرگى قارقىندى دامۋ جولىنا تۇسكەن ازەربايجاننىڭ ارحيتەكتورى دەسەك, ارتىق ايتقاندىق ەمەس. ونىڭ ساليقالى باسشىلىعىمەن ازەربايجاندا ەلەۋلى ساياسي جانە الەۋمەتتىك-ەكونوميكالىق وزگەرىستەر جاسالدى. ەل قيىن كەزەڭدەردى ەڭسەرىپ, دامۋدىڭ داڭعىل جولىنا ءتۇستى. الەمدىك قوعامداستىقتىڭ بەدەلدى مۇشەسى بولدى. شىن مانىندە, گەيدار اليەۆ ەسىمى ازەربايجاننىڭ ناعىز برەندىنە اينالدى. ونىڭ ءومىر جولى – ۇلتقا ادال قىزمەت ەتۋدىڭ جارقىن ۇلگىسى», دەدى مەملەكەت باسشىسى.
بۇدان بولەك, قاسىم-جومارت توقاەۆ گەيدار اليەۆتىڭ قازاقستان مەن ازەربايجان اراسىنداعى ەكىجاقتى قارىم-قاتىناستى نىعايتۋعا ولشەۋسىز ۇلەس قوسقانىنا توقتالدى. سونداي-اق ونىڭ قازاقتار تۋرالى جىلى پىكىر ءبىلدىرىپ قانا قويماي, ءتۇپ-تامىرىمىز بەن تاريحي مۇرامىز ورتاق ەكەنىن ۇنەمى ايتىپ وتىراتىنىن ەسكە الدى.
ءوز كەزەگىندە ازەربايجان پرەزيدەنتى يلحام اليەۆ ءبىزدىڭ ەلىمىزگە رەسمي ساپارى اياسىندا وسىنداي كەرەمەت تاريحي ساتكە كۋا بولىپ وتىرعانىنا قۋانىشتى ەكەنىن جەتكىزىپ, گەيدار اليەۆتىڭ تاۋەلسىز ازەربايجان مەملەكەتىنىڭ قالىپتاسۋىنداعى تاريحي رولىنە توقتالدى.
«قاسىم-جومارت كەمەل ۇلى گەيدار اليەۆتىڭ باۋىرلاس قازاق حالقىنا دەگەن ىقىلاسى مەن سۇيىسپەنشىلىگى ەرەكشە بولعانىن ايتتى. راسىندا, سولاي. مەن بۇعان كۋامىن. ول قازاقتاردىڭ سالت-ءداستۇرىن, مادەنيەتىن جاقسى بىلەتىن جانە كوپ عاسىرلىق تاريحىنا قۇرمەتپەن قارايتىن. ول قازاقتار مەن ازەربايجان حالقىنىڭ باۋىرلاستىعىن جوعارى باعالادى. سونداي-اق ول تۇركى الەمىن ودان ءارى بىرىكتىرۋ ءۇشىن قولىنان كەلگەننىڭ ءبارىن جاسادى. ءبىز بۇگىن تۇركى الەمىنىڭ بىرىگىپ, حالىقارالىق ارەنادا بەدەلدى جانە يە قۋاتتى ۇيىم قۇرعانىنا كۋا بولىپ وتىرمىز. بۇل – گەيدار اليەۆتىڭ دە ەڭبەگىنىڭ جەمىسى», دەدى ازەربايجان پرەزيدەنتى.