قىزىلوردا وبلىسىنىڭ اكىمى نۇرلىبەك نالىباەۆ قازالى اۋدانىندا جاسوسپىرىمدەر اراسىندا بولعان توبەلەسكە بايلانىستى شۇعىل جيىن وتكىزدى, دەپ حابارلايدى Egemen.kz.
قىزىلوردا وبلىسى اكىمدىگىنىڭ ءباسپاسوز قىزمەتى حابارلاعانداي, نۇرلىبەك نالىباەۆ قازالى اۋدانىندا بۇعان دەيىن دە جاپپاي توبەلەس بولعانىن, اۋدان اكىمى مەن جەرگىلىكتى پوليتسيانىڭ وسى جاعدايعا جول بەرىپ, ارەكەتسىزدىك تانىتقانىن قاتاڭ سىنادى. بۇعان قوسا, قىزىلورداداعى №217 مەكتەپ وقۋشىلارى سۋىق قارۋ قولدانعان.
بايقوڭىرداعى №275 مەكتەپتە دە توبەلەس تىركەلدى. جالاعاش كەنتىندە دە ەكى مەكتەپ وقۋشىسى اراسىندا جانجال شىققان.
پوليتسيا دەپارتامەنتى باسشىسىنىڭ مىندەتىن اتقارۋشى ءشامشيدين اميتوۆ پەن قىزىلوردانىڭ, قازالى جانە جالاعاش اۋداندارىنىڭ اكىمدەرى, وبلىستىق ءبىلىم باسقارماسىنىڭ باسشىسى مەيرامبەك شەرماعانبەت جاعدايعا بايلانىستى تۇسىنىكتەمە بەردى.
وبلىس اكىمى تاربيە جۇمىستارى تەك ەسەپ بەرۋ ءۇشىن وتكىزىلەتىنىن ايتتى. جاۋاپتىلار وقيعانىڭ الدىن الۋدىڭ ورنىنا ۇنەمى سالدارىمەن كۇرەسەدى.
ءوڭىر باسشىسى توبەلەستىڭ شىعۋ سەبەبىن انىقتاپ, شۇعىل شارا قابىلداۋدى تاپسىردى. مۇندايعا جول بەرگەن, ۋاقىتىلى باقىلاۋ جاساماعان لاۋازىمدى تۇلعالاردىڭ بارلىعىنا ءتيىستى شارا قولدانۋ كەرەك. نۇرلىبەك نالىباەۆ بۇل جاعدايدا اتا-انالار ءوز جاۋاپكەرشىلىگىن سەزىنۋ كەرەك ەكەنىن ەسكەرتتى. بالا تاربيەسىن مەكتەپكە جۇكتەپ قويۋعا بولمايدى.
ء«بارىمىز دە اتا-انامىز. ءاربىر اتا-انا ازاندا مەكتەپكە شىعارىپ سالعان بالاسىنىڭ ۇيگە ەسەن-ساۋ ورالاتىنىنا سەنىمدى بولۋى كەرەك. ال پوليتسيا مەن مەكتەپ بۇعان قول جەتكىزە الماي وتىر. قىزىلوردا قالاسى مەن قازالى, جالاعاش اۋدانى بويىنشا پوليتسيا باسقارمالارىنىڭ جاۋاپكەرشىلىگى قارالسىن. سونىمەن قاتار, اتالعان مەكتەپ ديرەكتورلارى مەن تاربيە ءىسى جونىندەگى ورىنباسارلارى دا وسى جاعدايعا جول بەرگەندەرى ءۇشىن ءتيىستى شارالارىن السىن», دەدى وبلىس اكىمى نۇرلىبەك نالىباەۆ.
جيىن سوڭىندا جاۋاپتى باسشىلارعا قالا مەن بارلىق اۋداندا رەيد ۇيىمداستىرۋ, اتا-انالار مەن جاسوسپىرىمدەر اراسىندا تۇسىندىرمە جۇمىستارىن جۇرگىزۋ تاپسىرىلدى.
ەسكە سالايىق, بۇعان دەيىن الەۋمەتتىك جەلىدە ءجاسوسپىرىمدى 5 وقۋشىنىڭ ۇرىپ جاتقان ۆيدەوسى تارادى. كۇدىكتىلەر انىقتالىپ, پولتسيا بولىمىنە جەتكىزىلگەن.
«اتالعان دەرەك بويىنشا قوسىمشا تەكسەرۋ جانە الەۋمەتتىك جەلىلەرگە جۇرگىزىلگەن مونيتورينگ ناتيجەسىندە كامەلەتكە تولماعان تۇلعانى ۇرىپ-سوققاندىعى انىقتالىپ, قازالى اۋداندىق پوليتسيا ءبولىمىنىڭ سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە قر قىلمىستىق كودەكسىنىڭ 293-بابىنىڭ 2-بولىگىمەن (بۇزاقىلىق) تىركەلىپ, تەرگەپ-تەكسەرۋ ارەكەتتەرى جۇرگىزىلىپ جاتىر», دەپ حابارلادى قىزىلوردا وبلىسى پوليتسيا دەپارتامەنتىنىڭ ءباسپاسوز قىزمەتى.