اقمولا وبلىسىندا ءىز-ءتۇزسىز جوعالعان بالا كارىز قۇدىعىنان ءولى تابىلدى. بۇل تۋرالى LIDER.KZ ەرىكتىلەرى Instagram پاراقشاسىندا جازدى, دەپ حابارلايدى Egemen.kz.
«بالانىڭ تۋىستارى مەن جاقىندارىنا شىن جۇرەكتەن كوڭىل ايتامىز», دەلىنگەن جازبادا.
اقمولا وبلىسى ءىىد ءباسپاسوز قىزمەتىنىڭ مالىمەتىنشە, 8 ساۋىردە ساعات 22:00 شاماسىندا تسەلينوگراد اۋدانىنىڭ پوليتسيا بولىمىنە قاراوتكەل (يلينكا) اۋىلىنىڭ تۇرعىنىنان ءتورت جاسار بالاسىنىڭ جوعالعانى تۋرالى حابارلاما تۇسكەن.
اتا-اناسىنىڭ ايتۋىنشا, ساعات 17:30 شاماسىندا بالا سەرۋەندەۋگە اۋلاعا شىققان, سودان بەرى ونىڭ قايدا ەكەنى بەلگىسىز بولعان.
«پوليتسيا قىزمەتكەرلەرى دەرەۋ ىزدەستىرۋ شارالارىن ۇيىمداستىرىپ, بالانىڭ دەنەسىن ءۇيدىڭ جانىنداعى كارىز قۇدىعىنان تاپتى.
قازىرگى ۋاقىتتا پوليتسەيلەر قايعىلى وقيعانىڭ ءمان-جايىن انىقتاۋ ءۇشىن قاجەتتى جەدەل-ىزدەستىرۋ شارالارىن جۇرگىزىپ جاتىر. تەرگەۋ قورىتىندىسى بويىنشا پروتسەسسۋالدىق شەشىم قابىلدانادى», دەلىنگەن حابارلامادا.