ماجىلىستەگى «اۋىل» پارتياسى فراكتسياسى دەپۋتاتى جيگۋلي دايراباەۆ ءوز مانداتىن تاپسىرمايتىنى ءمالىم بولدى, دەپ حابارلايدى Egemen.kz.
بۇگىن ءماجىلىس الاڭىندا جۋرناليستەر «اۋىل» پارتياسى فراكتسياسىنىڭ جەتەكشىسى, دەپۋتات اناس باققوجاەۆتان پارتيا مۇشەسى جيگۋلي دايراباەۆتىڭ ۇلدارىنا قاتىستى سۇراق قويدى.
«جۋىردا دەپۋتات جيگۋلي دايراباەۆتىڭ ەكى ۇلىنا قاتىستى سوت ۇكىمى شىقتى. دەپۋتات وسى وقيعادان كەيىن ءوز مانداتىن تاپسىرا ما؟» دەپ سۇرادى تىلشىلەر.
اناس باققوجاەۆتىڭ ايتۋىنشا, جيگۋلي دايراباەۆ دەپۋتاتتىق مانداتىن تاپسىرماي, ءوز قىزمەتىن جالعاستىرا بەرەدى.
«ول دەپۋتاتتىق مانداتىن تاپسىرمايدى. وسى ءساتتى پايدالانىپ, فراكتسيانىڭ مالىمدەمەسىن ايتا كەتسەم ءجون بولار. ءبىز وعان ەشقانداي ءمىن تاعا المايمىز. بىرىنشىدەن, اتالعان ىستە ونىڭ جەكە باسىنا قاتىستى ەشتەڭە ايتىلماعان. ەكىنشىدەن, ونىڭ بالالارى ەرەسەك ازاماتتار. ولار ءوز ىسىنە وزدەرى جاۋاپ بەرۋى كەرەك. ولار اۋىل شارۋاشىلىعىمەن ءبىرازدان بەرى اينالىسىپ كەلە جاتىر. تاۋەكەلدىڭ بارىن بىلەدى. وزدەرىن قورعاپ, وزدەرى جاۋاپتى بولۋى كەرەك», دەپ جاۋاپ بەردى «اۋىل» پارتياسى فراكتسياسىنىڭ جەتەكشىسى.
ەسكە سالا كەتسەك, 6 ساۋىردە تاراز قالاسىنىڭ №2 سوتى الاياقتىق جانە ءىرى مولشەردە اقشا جىمقىرۋ فاكتىسى بويىنشا ءۇش ادامدى جاۋاپقا تارتتى. سوتتالعان ءۇش ەر ادامنىڭ ەكەۋى ءماجىلىس دەپۋتاتى جيگۋلي دايراباەۆتىڭ ۇلدارى ەكەنى انىقتالدى.