2025 جىلعا دەيىن قازاقستاننان توكيو, سينگاپۋر, شانحاي جانە نيۋ-يورك باعىتتارىنا اۋە رەيستەرى اشىلادى. بۇل تۋرالى يندۋستريا جانە ينفراقۇرىلىمدىق دامۋ ءمينيسترى مارات قاراباەۆتىڭ مەملەكەت باسشىسىمەن كەزدەسۋىندە بەلگىلى بولدى, دەپ حابارلايدى Egemen.kz.
كەزدەسۋدە مينيستر قازاقستاندا «اشىق اسپان» رەجيمى ەنگىزىلىپ, ۇشۋ گەوگرافياسى كەڭەيىپ كەلە جاتقانىن جەتكىزدى. جوسپار بويىنشا, 2025 جىلعا دەيىن توكيو, سينگاپۋر, شانحاي جانە نيۋ-يورك باعىتتارىنا رەيستەر اشىلۋعا ءتيىس.
سونىمەن قاتار كەزدەسۋدە 2022 جىلى قازاقستان اۆياكومپانيالارى 11 ميلليونعا جۋىق جولاۋشى تاسىمالداپ, پاندەمياعا دەيىنگى كورسەتكىشكە قول جەتكىزگەنى بەلگىلى بولدى.
بۇدان بولەك مينيستر پرەزيدەنتكە كولىك ينفراقۇرىلىمىنىڭ دامۋى, كەن ورىندارىنا جۇرگىزىلگەن تەكسەرۋ جۇمىستارىنىڭ قورىتىندىسى, جولداردىڭ ساپاسىن جاقسارتۋ, حالىقتى تۇرعىن ۇيمەن قامتاماسىز ەتۋ ماسەلەلەرى جونىندە اقپارات بەردى.
قاسىم-جومارت توقاەۆ مينيسترگە ورتا بيزنەستى دامىتۋ جانە شيكىزات سەكتورىنا, تاۋ-كەن ونەركاسىبى مەن گەولوگيالىق بارلاۋ سالالارىنا ينۆەستيتسيا تارتۋ جۇمىستارىن كۇشەيتۋدى تاپسىردى. سونداي-اق جول بويىنداعى, سونداي-اق الەۋمەتتىك, ينجەنەرلىك جانە كوممۋنالدىق ينفراقۇرىلىمداردى جاڭعىرتۋعا ەرەكشە نازار اۋدارۋدى, وندىرىستەگى وتاندىق ۇلەستى ارتتىرۋ جۇمىسىن كۇشەيتۋدى جانە قالا قۇرىلىسى كودەكسىن ازىرلەۋدى جەدەلدەتۋدى تالاپ ەتتى.