ۇلىستىڭ ۇلى مەيرامىندا ۇلتتىق ونەردىڭ ءورىسى كەڭىپ, وزبەكستاننىڭ تەرمەز قالاسىندا كوكپاردان حالىقارالىق جارىس وتكەن ەدى. دەلەبەنى قوزدىرار دودالى جارىسقا الماتى وبلىسىنىڭ تاقىمى مىقتى كوكپارشىلارىنان قۇرالعان «الاتاۋ» كومانداسى قاتىستى.
وزبەكستان پرەزيدەنتىنىڭ كۋبوگى ساراپقا سالىنعان بۇل جارىستا وبلىستىڭ نامىسىن قورعاعان «الاتاۋ» كوكپار كومانداسى ىرىكتەۋ سىندارىندا قارسىلاس «وزبەكستان-2» جانە «قارابايىر» (وزبەكستان) كوماندالارىن ارتقا تاستاپ, شەشۋشى ويىندا قىرعىزستان قۇراما كومانداسىن 12:4 ەسەبىمەن ويسىراتا جەڭىپ, بايراقتى باسەكەنىڭ باس بايگەسىن قانجىعاسىنا بايلاعان-دى.
وسىعان وراي, حالىقارالىق جارىستىڭ جەڭىمپازى اتانعان «الاتاۋ» كوكپار كومانداسىن الماتى وبلىسىنىڭ اكىمى مارات سۇلتانعازيەۆ قۋانىشپەن قارسى الىپ, ۇلتتىق سپورتقا قوسقان سۇبەلى ۇلەسى مەن حالىقارالىق جارىستا جوعارى ناتيجە كورسەتكەندەرى ءۇشىن «الاتاۋ» كوكپار فەدەراتسياسىنىڭ پرەزيدەنتى ءسابيت قاسەنوۆكە جانە كوماندا باپكەرى مەن سپورتشىلارعا العىسحاتىن تابىس ەتتى.
وسىدان ەكى جىل بۇرىن «جەتىسۋ» اتاۋىمەن قۇرىلىپ, كەيىن «الاتاۋ» اتالعان كوكپار كومانداسىنىڭ از ۋاقىت ىشىندەگى جەتىستىگى جان جادىراتارلىق. وعان 2022 جىلعى رەسپۋبليكالىق چەمپيوناتتىڭ ءبىرىنشى ليگاسىندا توعىز كوماندانىڭ ىشىنەن توپ جارىپ, چەمپيون اتانۋى دالەل.
الماتى وبلىسىنىڭ ەكىگە بولىنۋىنە وراي بيىلدان باستاپ «الاتاۋ» اتاۋىن ەنشىلەگەن كوكپارشىلاردىڭ حالىقارالىق باسەكەدەگى بۇل جەڭىستەرى ءجىبىن ۇزبەي جالعاساتىنىنا سەنىمدى. ات جالىندا وينايتىن ەپتى دە جۇرەكتى ءارى بىلەكتى جەكپە-جەك شەبەرى تەمىرلان سەيىتبەكوۆ پەن ەرجانات توقتارباەۆتىڭ جانە باقىتجان سايدولدانوۆ, ەرەجەپ اباي باستاعان سايىپقىرانداردىڭ ويىندارى قاشاندا كورەرمەننىڭ قوشەمەتىنە يە. بىلىكتى كوكپارشىلاردىڭ ىزىنەن ىلەسكەن جاس سپورتشىلار سەرىك ءابۋوۆ, ايدوس امانتاەۆتار ەرتەڭىنەن مول ءۇمىت كۇتتىرەدى. باس باپكەر سايات سىدىرمانوۆ باپتاعان كوماندانىڭ 7 ويىنشىسى بۇگىندە قازاقستان قۇراماسىنىڭ ساپىندا ونەر كورسەتىپ ءجۇر.
الماتى وبلىسى