بۇرىنعى اقش پرەزيدەنتى دونالد ترامپتىڭ باسى داۋعا قالدى. وعان پورنواكتريسا ستورمي دەنيەلسكە ءوزارا قارىم-قاتىناسىن جاسىرۋ ءۇشىن اقشا تولەگەن دەپ ايىپ تاعىلىپ وتىر. وسىعان بايلانىستى تۋىنداعان داۋ-داماي مۇحيتتىڭ ارعى بەتىن عانا ەمەس, بۇكىل الەمدى ءدۇر سىلكىنتتى.
وسىلايشا, د.ترامپ قىلمىستىق قۇقىق بۇزۋشىلىق بويىنشا ايىپتالعان اقش-تىڭ العاشقى ەكس-پرەزيدەنتى اتانباق. ءىس ناسىرعا شاپسا, ونىڭ ساۋساق ءىزىن الىپ, ارنايى سۋرەتكە ءتۇسىرىپ, كۇدىكتى رەتىندە جاۋاپ بەرۋى مۇمكىن. سونداي-اق القا بيلەر الدىندا جاۋاپ بەرەتىن ءبىرىنشى ەكس-پرەزيدەنت بولۋى دا ىقتيمال.
بۇقارالىق اقپارات قۇرالدارىندا تاراعان مالىمەتكە سۇيەنسەك, د.ترامپ پەن س.دەنيەلس 2006 جىلى تانىسقان. ەكەۋارا تانىستىق مۇنىمەن شەكتەلمەي, ءبىراز جەرگە بارعانعا ۇقسايدى. كەيىنىرەك پورنواكتريسا وسى وقيعانى ەلدەگى سارجاعال باسىلىمدارعا ساتپاقشى بولعان. اسىرەسە, د.ترامپ 2016 جىلى پرەزيدەنتتىككە تالاسقاندا بۇل داۋ ءورشىدى. الىپ-قاشپا اڭگىمە كوبەيىپ كەتپەس ءۇشىن ترامپتىڭ جاقتاستارى س.دەنيەلسكە قوماقتى قارجى ۇسىنىپ, بولعان وقيعانى جارياعا جار سالماۋىن وتىنگەن كورىنەدى. نەگىزى مۇنداي ارەكەت اقش زاڭىنا تومپاق ەمەس. بىراق ترامپ پەن ونىڭ ادۆوكاتى تولەمدى زاڭ جۇزىندە جاسالعان دەپ كورسەتكەن. ال نيۋ-يورك شتاتىندا مۇنى ەسەپ بەرۋدى بۇرمالاۋ دەپ سانايدى. سوندىقتان قىلمىستىق ءىس قوزعالادى.
بۇعان قوسا, اق ءۇيدىڭ بۇرىنعى باسشىسىنا تاعى ەكى ايىپ تاعىلىپ وتىر. ازىرگە ول تۋرالى كوپ اقپارات جوق. بىراق بارىندە پارا بەرۋگە تالپىنعانى ايتىلادى. سوندىقتان قىلمىستىق ءىس قوزعاۋ بارىسىندا وعان ناقتى قانداي ايىپ تاعىلاتىنىن ازىرگە ءدوپ باسىپ ايتۋ قيىن. دەگەنمەن ترامپ پەن ونىڭ جاقتاستارى قىلمىستىق ءىستى ساياسي بەلسەندىلىكپەن بايلانىستىرادى.
كەلەسى جىلى اقش-تا پرەزيدەنت سايلاۋى وتەدى. د.ترامپ ساياسي باسەكەگە قاتىساتىنىن مالىمدەگەن. ونىڭ جاقتاستارى 2024 جىلعى سايلاۋدا جەڭىسكە جەتەتىنىنە سەنىمدى. سول سەبەپتى تاعىلعان ايىپتى سايلاۋ الدى ناۋقانعا كەدەرگى كەلتىرۋ دەپ ەسەپتەيدى.
وتكەن سەنبىدە تەحاستا جاقتاستارىمەن كەزدەسۋدە سويلەگەن سوزىندە ترامپ وزىنە تاعىلعان ايىپقا قاتىستى پىكىر ءبىلدىردى. ونىڭ ايتۋىنشا, بۇل – پروكۋروردىڭ تەرىس ارەكەتى. «سولاقاي مانياكتار ءۇشىن ادامنىڭ كىناسىز ەكەنىنىڭ ەش ايىرماشىلىعى جوق», دەدى د.ترامپ.
اق ءۇيدىڭ بۇرىنعى باسشىسىنا ايىپ تاعىلعانى بەلگىلى بولا سالا, رەسپۋبليكا پارتياسىنىڭ بىرنەشە مۇشەسى د.ترامپتى جاقتاپ پىكىر ءبىلدىردى. وكىلدەر پالاتاسىنىڭ بىرقاتار جوعارى لاۋازىمدى كونگرەسمەنى ايىپتاۋ قورىتىندىسىن شەكتەن شىققان دەپ اتاپ, مۇقيات پارلامەنتتىك تەرگەۋ جۇرگىزۋگە ۋادە بەردى.
«2024 جىلعى پرەزيدەنت سايلاۋىنا ارالاسۋعا تالپىنعان نيۋ-يورك پروكۋرورى ۇلتقا ورنى تولماس زيان كەلتىردى», دەدى وكىلدەر پالاتاسىنىڭ سپيكەرى كەۆين ماككارتي.
ترامپ اكىمشىلىگى كەزىندە مەملەكەتتىك حاتشى قىزمەتىن اتقارعان مايك پومپەو دا ءوز كوزقاراسىن جەتكىزدى. «اۋىر قىلمىس جاساعان كەز كەلگەن ادامدى قۋدالاۋ – امەريكالىقتار قاۋىپسىزدىگىنىڭ كەپىلى. بىراق ساياسي قۋدالاۋ امەريكالىق زاڭ جۇيەسىن تەرىس پايدالانۋ قۇرالىنا اينالدىرۋ قاۋپىن تۋدىرادى», دەدى ول.
فلوريدا باسشىسى رون دەسانتيس تە تاعىلعان ايىپتى «امەريكالىق رۋحقا» ساي كەلمەيتىنىن ايتىپ, ايىپتادى. جالپى, ونىڭ پىكىرى ماڭىزدى ەكەنى انىق. ويتكەنى دەسانتيس – رەسپۋبليكا پارتياسىنداعى د.ترامپتىڭ باستى قارسىلاسى. ياعني كەلەسى جىلعى سايلاۋعا قاتىسۋعا فلوريدا باسشى دا تىلەك ءبىلدىرىپ وتىر. سوعان قاراماستان, ول ساياسي باسەكەلەسىن جاقتادى.
ايتسە دە, كەيبىر ساراپشىلار دەسانتيستىڭ ارەكەتىن ساياسي قادام دەپ ەسەپتەيدى. الدا-جالدا فلوريدا باسشىسى نيۋ-يورك پروكۋرورىنىڭ ايىبىنا كەلىسىپ, ترامپتى بەرۋگە كەلىسسە, وندا رەسپۋبليكا پارتياسىنداعى جاقتاستارىن جوعالتۋى مۇمكىن. مۇنداي جاعدايدا اق ءۇيدىڭ باسشىسى اتانۋعا دەگەن ءۇمىتىنىڭ ك ۇلى كوككە ۇشادى.
وسى وقيعاعا بايلانىستى اق ءۇي ەشقانداي پىكىر بىلدىرگەن جوق. بۇعان دەيىن دە دجو بايدەن مەن ونىڭ اكىمشىلىگى 2021 جىلى ترامپقا يمپيچمەنت جاريالاۋعا قاتىستى دا كوزقاراسىن ايتپاعان ەدى.
قىسقاسى, كەلەسى اپتا اقش ءۇشىن تارتىسقا تولى بولماق. د.ترامپ سەيسەنبى كۇنى نيۋ-يورككە بارىپ, القا بيلەر الدىندا جاۋاپ بەرمەك. وقيعانىڭ ەندى قالاي ءوربيتىنىن ءدوپ باسىپ ايتۋ قيىن. دەگەنمەن ترامپقا تىقىر تايانعانى ايدان انىق.