كەرەكۋدە اقپارات كەڭىستىگىنە ءوز الدىنا ورەلى ماقسات-مىندەتتەردى مەجەلەي كەلگەن «AIQARA.KZ» اقپاراتتىق پورتالى اشىلدى. انا تىلىمىزدەگى ساپالى ساراپتامالىق ماقالالار مەن بەينە پودكاستار ۇسىناتىن اقپارات قۇرالى ۇلتتىڭ ءۇنى, قوعامنىڭ شامشىراعى بولۋدى كوزدەپ وتىر, دەپ حابارلايدى Egemen.kz.
بۇگىنگى بۇقارا ايقىن دا ناقتى, سالماقتى دا شىنايى, بارىنشا ساراپتالعان اقپاراتقا ايرىقشا ءزارۋ. اسىرەسە, قازاق ءتىلدى اقپارات كەڭىستىگىندە ساراپتالىپ-سارالانعان, سۇرىپتالىپ-ەكشەلگەن, شىنايىلىققا نەگىزدەلگەن ماتەريالدارعا دەگەن سۇرانىس ارتىپ تۇر. مىنە, وسىناۋ قاجەتتىلىكتەردى ەسكەرىپ, قالىپتاسقان ولقى تۇستاردىڭ ورنىن تولتىرماق ماقساتپەن ەرتىستىڭ پاۆلودار وڭىرىندە AIQARA.KZ اتالاتىن اقپاراتتىق پورتال ىسكە قوسىلىپ وتىر.
اقپاراتتىق پورتالدىڭ اشىلۋىنا اقپارات جانە قوعامدىق دامۋ ۆيتسە-ءمينيسترى دانيار قادىروۆ قاتىسىپ, جەرگىلىكتى قازاق ءتىلدى جۋرناليستەردىڭ باستاماسىنا ساتتىلىك تىلەدى.
ايتىپ وتەيىك, پورتالدىڭ قۇرىلتايشىسى – «ەرتىس مەديا» جشس. سەرىكتەستىكتىڭ ديرەكتورى ايدا حامزينا انا تىلىمىزدەگى جوبانىڭ كەلەشەگى زور ەكەنىن, الدا پورتالدى جەتىلدىرىپ, جان-جاقتى دامۋىنا قولداۋ جاسالاتىنىن تىلگە تيەك ەتتى. اقپاراتتىق سايت وڭىرلىك بولعانىمەن, تۇتاس ەلىمىزدىڭ اقپاراتتىق كەڭىستىگى ءۇشىن ماڭىزدى بولاتىنى انىق.
ال اۋقىمدى جوبانى جۇزەگە اسىرۋعا اقپارات سالاسىنىڭ ۇزدىگى, حالىقارالىق «قازاق ءتىلى قوعامى» پاۆلودار وبلىستىق فيليالىنىڭ توراعاسى, جاڭا پورتالدىڭ باس رەداكتورى اسىل ءابىش مۇرىندىق بولدى.
– پورتال الاڭدارىندا تۇتاس قوعامدى تولعاندىراتىن ماسەلەلەر, ويىڭىزبەن ورايلاس, پىكىرىڭىزبەن ۇندەس, تانىمىزعا تاتيتىن, تالعامىڭىزعا ءدوپ كەلەتىن اقپارات كورىنىس تابادى دەپ وتىرمىز. ايپارا الەمگە ايقارا قاراۋعا شاقىراتىن, كوز جەتپەس جەرگە ءسوز جەتەتىنىن باسشىلىققا الا وتىرىپ, مالىمەتتى مەيلىنشە ساراپتاپ بەرۋگە كۇش سالاتىن جاڭا سايتتىڭ ءتىلى دە, ءۇنى دە قازاقشا شىعاتىنىن قاپەرگە سالماقپىن. تاسقىنى مەزگىل سايىن ۇدەي تۇسكەن اقپاراتتىڭ انىعى مەن قانىعىن, دۇرىسى مەن بۇرىسىن ەكشەپ الۋ بۇگىنگى قوعامعا وڭاي بولماي وتىرعانىن مويىنداۋىمىز كەرەك. وكىنىشكە قاراي, الەۋمەتتىك جەلى الاڭدارى جەلىك قۋعان جەل سوزگە, شىندىققا جاناسپايتىن, اقيقاتتان الشاق, جالعان اقپارعا تولىپ كەتتى. اقپاراتتىق كەڭىستىكتە جۇرتشىلىقتى جاڭىلىستىراتىن, اقيقاتتان اداستىراتىن, ونى-مۇنى ماسەلەنى جەتكىزۋ بارىسىندا ءبىر تاراپقا عانا بۇرا تارتاتىن ارەكەتتەر دە ەتەك العانى راس, – دەيدى اسىل ءابىش.
ەلەكتروندى كەڭىستىككە توپتاسقان جەرگىلىكتى تاجىريبەلى جۋرناليستەر قازاق تىلىندەگى اقپاراتتاردى ابدەن سۇزگىدەن وتكىزىپ, ساراپتاپ, بارىنشا ايقارا, ياعني كەڭ قۇلاشتى تۇرعىدا, تەرەڭ تانىمدا الۋعا مۇمكىندىك جاساۋ ميسسياسىن جۇزەگە اسىرادى. پورتال ءتۇرلى ءبولىم-ساناتتاردى توپتاستىرىپ, كۇندەلىكتى تۇرعىدا جانە ءار قيلى باعىتتار مەن تاقىرىپتاردا ماقالالاردى, بەينە-كونتەنتتەردى ۇسىنۋدى كوزدەيدى.