بۇل تۋرالى اسحات ايماعامبەتوۆ ءوزىنىڭ Facebook پاراقشاسىندا جازدى, دەپ حابارلايدى Egemen.kz.
«پارلامەنت – زاڭ شىعارۋ بيلىگىن جۇزەگە اسىراتىن ەڭ جوعارى وكىلدى ورگان. ۇكىمەتتىڭ قۇزىرەتىنە جاتاتىن ماسەلەلەردى اجىراتۋ ماڭىزدى. ۇكىمەتتىڭ بۇرىنعى مۇشەسى رەتىندە ماعان بۇل ماسەلەلەر وتە جاقسى تانىس ءارى تۇسىنىكتى. ءبىزدىڭ نەگىزگى جۇمىسىمىز وزەكتى ماسەلەلەردى شەشۋ ءۇشىن زاڭنامالىق نورمالاردى قابىلداۋعا, ونىڭ جۇزەگە اسىرىلۋىن باقىلاۋعا باعىتتالعان.
مەديتسينا قىزمەتكەرلەرىنىڭ مارتەبەسىن بەكىتۋ, ونىڭ ىشىندە مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ جانە مەديتسينا قىزمەتكەرلەرىن قورلاعانى ءۇشىن جاۋاپكەرشىلىككە تارتۋدى, ەلىمىزدىڭ مەديتسينا قىزمەتكەرلەرىنىڭ قۇقىقتارىن قورعاۋدى, ەڭبەگى مەن دەنساۋلىعىن قورعاۋدى قامتاماسىز ەتەتىن زاڭدى جەتىلدىرۋ ماسەلەلەرىن قاراستىرۋ قاجەت», دەپ جازدى اسحات ايماعامبەتوۆ.
سونىمەن قاتار ول ايەلدەر مەن بالالاردى قورعاۋ بويىنشا ارنايى نورمالار قابىلدايتىن ۋاقىت جەتكەنىن ايتتى. بالالاردىڭ تەرەزەدەن قۇلاۋىنىڭ الدىن الۋ, ولارعا ەرەكشە قامقورلىق كورسەتۋ ماسەلەسى دە وزەكتى ەكەنىن اتاپ ءوتتى.
«ودان بولەك, ءبىلىم يننوۆاتسيا ليتسەيلەرى, اباي اتىنداعى, ساتباەۆ اتىنداعى مەكتەپتەر سياقتى جەلىلىك ءبىلىم وردالارىنىڭ مارتەبەسىن بەكىتۋ, 10-11 سىنىپ وقۋشىلارىنا جۇمىسشى بىلىكتىلىگىن الۋ ءۇشىن ءبىلىم بەرۋ گرانتىنىڭ جاڭا ءتۇرىن ەنگىزۋ بويىنشا نورمالاردى قابىلداۋ, ءبىلىم بەرۋ ۇيىمدارىنىڭ باسشىلارىنا ولاردىڭ قۇزىرەتىنە كىرمەيتىن ماسەلەلەر ءۇشىن ادىلەتسىز ايىپپۇل سالۋدى توقتاتۋ, پەداگوگيكالىق ماماندىققا ءتۇسۋ ءۇشىن شەكتى بالدى بەكىتۋ بويىنشا زاڭنامالىق نورمالار قاجەت», دەپ جازدى دەپۋتات.
سونداي-اق جازبادا مەكتەپ, بالاباقشا, ەمحانا قۇرىلىسى قاراستىرىلماعان جەرلەردە جانە الەۋمەتتىك ماڭىزى بار نىسانداردىڭ ورنىنا بوي كوتەرەتىن تىعىز ورنالاسقان قۇرىلىستارعا جول بەرمەۋ ماسەلەسى دە بار.
ونىڭ ايتۋىنشا, مەملەكەتتىك ساتىپ الۋ تۋرالى زاڭ دا ەرەكشە نازار اۋدارۋعا لايىق.
«بۇگىندە اتالعان زاڭ مەديتسينا, ءبىلىم بەرۋ جانە عىلىمي ۇيىمداردىڭ باسشىلارىن تىعىرىققا تىرەپ وتىر. سىبايلاس جەمقورلىق تاۋەكەلدەرى جويىلعان جوق, بيۋروكراتيالىق راسىمدەر مەن قىزمەتتەردىڭ, تاۋارلار مەن جۇمىس ساپاسى سىن كوتەرمەيدى.
عىلىم سالاسىندا دا كوپتەگەن ماسەلە زاڭنامالىق شەشىمدى قاجەت ەتەدى. عىلىمنىڭ دامۋىنا جاعداي جاساۋ جانە عىلىمي ەڭبەك ناتيجەلەرىن كوممەرتسيالاندىرۋ ءۇشىن جاڭا زاڭ دايىنداۋ ماڭىزدى.
ءماسليحاتتىڭ ەكى شاقىرىلىمدا دەپۋتات بولعان كەزدەگى, ءماسليحاتتىڭ الەۋمەتتىك ماسەلەلەر جونىندەگى كوميسسياسىنىڭ توراعاسى, پەداگوگ, وڭىردەگى مەملەكەتتىك قىزمەتتە جانە ورتالىق مەملەكەتتىك ورگانداردا, ۇكىمەت مۇشەسى رەتىندە جۇمىس ىستەگەن كەزدە جيناعان تاجىريبەم مەنىڭ الداعى قىزمەتىمدە دە كومەكتەسەدى دەپ ۇمىتتەنەمىن.
مەن ءوز قىزمەتىمدە بۇرىنعىداي اشىقتىق پەن ەسەپ بەرۋ, ادىلدىك پرينتسيپتەرىن ۇستانامىن», دەپ جازدى ايماعامبەتوۆ.