پرەزيدەنت بيىل قىستا كەيبىر ايماقتاردىڭ جىلۋسىز قالعانىن ايتىپ, ەنەرگەتيكا ينفراقۇرىلىمى جۇمىسىن سىنعا الدى, دەپ حابارلايدى Egemen.kz.
«ينفراقۇرىلىمدى دامىتۋعا قاتىستى ۇستانىمداردى قايتا قاراۋ قاجەت. بيىلعى قىستىڭ قالاي وتكەنىن بارشاڭىز بىلەسىزدەر. قىستىڭ كوزى قىراۋدا بىرقاتار ايماقتا قالالار مەن ەلدى مەكەندەر جىلۋسىز قالدى. ابدەن توزعان ەنەرگەتيكا ينفراقۇرىلىمى ارەڭ جۇمىس ىستەپ تۇر», دەدى ق. توقاەۆ.
مەملەكەت باسشىسى بۇل ماسەلەنى باقىلاۋعا الىپ, ارنايى تاپسىرما بەرگەنىن ايتتى. سونىمەن قاتار ماجىلىسكە ۇسىنىلعان زاڭ جوبالارىن تەز ارادا قاراۋدى تاپسىردى.
«مەنىڭ تاپسىرماممەن ەلەكتر ەنەرگەتيكاسى نارىعىن دامىتۋدىڭ جاڭا ۇلگىسى دايىندالىپ جاتىر. سول ارقىلى وسى سالاعا قوسىمشا ينۆەستيتسيا تارتۋ كوزدەلىپ وتىر. سونداي-اق بۇل قۇجات وسى سالانىڭ بارىنشا اشىق بولۋىن قامتاماسىز ەتپەك. قازىر ءماجىلىستىڭ قاراۋىندا ەلەكتر ەنەرگەتيكاسىنا قاتىستى ءۇش زاڭ جوباسى جاتىر. دەپۋتاتتىق كورپۋس زاڭناماداعى ءتيىستى وزگەرتۋلەردى شۇعىل تۇردە قاراپ, قابىلداۋعا ءتيىس. كوممۋنالدىق جەلىلەردىڭ ابدەن توزۋ سالدارىنان بارلىق وڭىردە دەرلىك قايتا-قايتا اپات بولىپ جاتىر. كوپتەگەن قالادا جول, ەلەكتر تاراتۋ جەلىسى, گاز قۇبىرى سەكىلدى نەگىزگى ينفراقۇرىلىمداردىڭ تاپشىلىعى قاتتى بايقالادى. ءبىز ەلىمىزدىڭ ينفراقۇرىلىمدىق قۋاتىن قالىپتاستىرۋىمىز قاجەت. سوندىقتان مەن ۇلتتىق ينفراقۇرىلىم جوسپارىن قابىلداۋدى ۇسىنامىن. قۇجاتتا وسى سالاداعى باستى ماسەلەلەر اشىق كورسەتىلۋگە ءتيىس. سونىمەن بىرگە 2029 جىلعا دەيىن ىسكە اسىرىلاتىن نەگىزگى جوبالار قامتىلۋى قاجەت», دەدى پرەزيدەنت.