قاسىم-جومارت توقاەۆ VIII سايلانعان پارلامەنتتىڭ ءبىرىنشى سەسسياسىندا قازاقستاندىقتارعا العىس ءبىلدىردى, دەپ حابارلايدى Egemen.kz.
پرەزيدەنت ءوز سوزىندە باستى رەفورمالاردى اتاپ ءوتتى.
«رەفورمالارىمىز «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداسىنا نەگىزدەلدى. بۇل قاعيدا – مەملەكەتىمىزدىڭ باستى تىرەگى», دەدى ول.
سونداي-اق ول رەفورلامالارعا سايكەس وتكىزىلگەن سايلاۋ حالىقتىڭ كوپتەن كۇتكەن وزگەرىسى ەكەنىن ايتتى.
«رەفەرەندۋمنان كەيىن كونستيتۋتسيانىڭ جاڭا تالاپتارىنا ساي بيلىك تارماقتارىن تۇگەل جاڭعىرتۋعا كىرىستىك. حالىقتىڭ دا كوپتەن كۇتكەنى وسى ەدى. كونستيتۋتسيالىق وزگەرىستەرگە سايكەس پرەزيدەنت سايلاۋى, سەنات, ءماجىلىس جانە ءماسليحاتتار سايلاۋى ءوتتى», دەدى مەملەكەت باسشىسى.
بۇدان سوڭ, كۇردەلى كەزەڭدەگى ءتيىمدى وزگەرىستەر حالىقتىڭ سەنىمىن وياتقانىن اتاپ ءوتتى.
«رەفەرەندۋمدى قوسقاندا ءبىر جىلعا جۋىق ۋاقىتتىڭ ىشىندە وتە ماڭىزدى 5 ساياسي ناۋقان وتكىزىلدى. ونىڭ ءبارى اسا كۇردەلى كەزەڭگە تۇسپا-تۇس كەلدى. قانشالىقتى كۇردەلى بولسا دا, ءبىز ەلىمىز ءۇشىن وتە قاجەت جولدى قىسقا مەرزىم ىشىندە ءجۇرىپ وتتىك. قازاقستاننىڭ جاڭارىپ, جاڭعىرا باستاعانىنا جۇرتتىڭ كوزى جەتتى», دەپ قوستى قاسىم-جومارت توقاەۆ.
ءارى بۇل جولعى سايلاۋدىڭ ەرەكشەلىگىن ايتا كەلە, سايلاۋعا بەلسەندى قاتىسىپ, ءوز تاڭداۋىن جاساعان ازاماتتارعا العىسىن ءبىلدىردى.
«كەشەگى سايلاۋدا پارتيالارمەن قاتار كوپتەگەن ازاماتىمىز ءبىر مانداتتى وكرۋگتەن ءوزىن-ءوزى ۇسىندى. وسىلايشا, حالقىمىز ماڭىزدى وزگەرىسكە ءوز ۇلەسىن قوسۋعا دايىن ەكەنىن دالەلدەدى. ەلىمىزدە جاڭا ازاماتتىق, ساياسي مادەنيەت قالىپتاسىپ جاتىر. مەن سايلاۋعا بەلسەنە قاتىسقان بارشا ازاماتقا العىس ايتامىن», دەدى پرەزيدەنت.