قوستاناي پوليتسەيلەرى تال تۇستە قالاعا كىرىپ كەتكەن ەلىكتى قۇتقارىپ قالدى. اداسىپ كەلگەن دالا ەركەسىن قالا شەتىندەگى كاربىشەۆ كوشەسىنىڭ تۇرعىندارى بايقاعان.
وبلىستىق پوليتسيا دەپارتامەنتىنىڭ مالىمەتىنشە, 19 ناۋرىزدا «102» جەدەل پۋلتىنە قالا تۇرعىندارىنىڭ ءبىرى كاربىشەۆ كوشەسىندەگى «ستەكلوتسەنتر» كاسىپورنىنىڭ ماڭىندا ەلىك جۇرگەنى تۋرالى حابار تۇسىرگەن.
جاقىن ماڭايدا اۆتوپاترۋل كەزەكشىلىگىندە جۇرگەن ايداربەك سادىروۆ پەن جاسۇلان توقتاروۆ تۇرعىن ايتقان جەرگە جەدەل جەتەدى.
– ءبىز كەلسەك, ەلىك تەمىر تورلى قورشاۋعا باسىن سۇعىپ الىپتى. جانى قىسىلعان جانۋاردى ۇركىتىپ الساڭ, موينىنا زاقىم كەلتىرىپ الۋى مۇمكىن. سوندىقتان اسىقپاي قيمىلداپ, ابايلاپ ءجۇرىپ تەمىر قۇرساۋدان بوساتىپ الدىق. ارتقى اياقتارىن بايلاپ, قىزمەتتىك كولىكتىڭ ارتقى ورىندىعىنا جاتقىزدىق. ودان كەيىن التىنسارين اۋدانىنداعى تابيعي مەكەنىنە جىبەردىك, – دەيدى ءتارتىپ ساقشىلارى.
قوستاناي وبلىسى