وسى ءبىر تالدىرماش, قايسار قىزدىڭ تالايدىڭ قولايىنا كەلمەگەن اۋىر قىلمىستىق ىستەردى ۇرشىقشا ءيىرىپ اكەتەتىنى بولىمدەگى ارىپتەستەرىنە كەيدە سيقىرداي كورىنەتىنى راس. قىلمىس الەمىندەگى قانشاما قۇپيانى اشۋ ءۇشىن ەسەپسىز تەر توگىلەتىنىن بىلايعى جۇرت قايدان ءبىلسىن. زاميرا يساكوۆانىڭ مىندەتى – اق پەن قارانىڭ, كىنالى مەن جازىقسىزدىڭ ارا-جىگىن اجىراتۋ.
زاميرا يساكوۆا – پاۆلودار قالاسىنداعى سولتۇستىك پوليتسيا بولىمىندە تالماي قىزمەت ەتىپ كەلە جاتقان, تاجىريبەسى تولىعا تۇسكەن تەرگەۋشى. نازىك جانعا كوبىنە اسا اۋىر قىلمىس, قاساقانا كىسى ءولتىرۋ, كىسى ولىمىنە سوقتىرعان ادام دەنساۋلىعىنا قاساقانا اۋىر زيان كەلتىرۋ سيپاتىنداعى قىلمىستىق ىستەر سەنىپ تاپسىرىلاتىنى سوندىقتان. تەك بىلتىر مامان وسىنداي فاكتىلەر بويىنشا سوتقا 36 قىلمىستىق ءىس جولداعان. سوتقا دەيىنگى قىلمىستىق ىستەردى بۇگە-شىگەسىنە دەيىن زەرتتەپ, ىسكە قاتىسى بار تۇلعالاردى انىقتاۋ, وقيعانىڭ ءمان-جايىن تولىق تىزبەكتەپ, كۋاگەرلەر مەن دالەلدەمەلەردى ىزدەپ تابۋ, قىلمىستىق ساراپتامالاردى دايىنداۋ, ولاردىڭ ناتيجەسىن سالىستىرۋ, جاسىرىن تەرگەۋ ارەكەتتەرىن ۇيىمداستىرۋ, تاعىسىن-تاعى تولىپ جاتقان بولىكتەردەن تۇراتىن سوتقا دەيىنگى تەرگەۋ شارالارىن زاميرا باحتىبەكقىزى كاسىبي تۇرعىدان جۇرگىزۋدىڭ شەبەرى دەپ باعا بەرەدى ونىڭ ارىپتەستەرى.
بىلتىر قازان ايىنىڭ ورتا شەنىندە وبلىس ورتالىعىندا تۇراتىن زەينەتكەر تالتۇستە ءوزىنىڭ كۇيەۋ بالاسىن تاپانشامەن جايراتىپ سالىپ, ەل-جۇرتتى شۋلاتقانى بار. قىرىق جاستاعى ازامات جەدەل جاردەم كەلگەنشە وقيعا ورنىندا كوز جۇمىپ, كۋاگەرلەر پوليتسياعا حابارلاعان. ءتارتىپ ساقشىلارى كۇدىكتىنى قاشىپ بارا جاتقان جەرىنەن پاۆلودار – ومبى تاس جولىندا توقتاتىپ, قولعا تۇسىرگەنىمەن, ونىڭ كىناسىن تولىق مويىنداتۋ ءبىراز ۋاقىتتى العان. اتالعان فاكتى نەگىزىندە قىلمىستىق كودەكستىڭ 99-بابى بويىنشا سوتقا دەيىنگى تەرگەۋ باستالعاندا بۇل ىسپەن زاميرا يساكوۆا باسى ءبۇتىن شۇعىلدانعان ەكەن.
– اكادەميك ساتباەۆ كوشەسى, 40-ءۇيدىڭ اۋلاسىندا بولعان سول ءبىر قاندى وقيعا ەسىمدە ەرەكشە ساقتالىپ قالدى. زەينەتكەردىڭ كىناسىن دالەلدەۋ ءۇشىن دالەلدەمەلەردى تۇينەكتەپ جينادىق. سەبەبى كۇدىكتى قىلمىستى جاساعان ساتتەن-اق ءىزىن جابۋعا ارەكەتتەنگەن. بىردەن بارىپ ەرتىس وزەنىنە تاپانشاسىن لاقتىرىپ جىبەرەدى. سۇڭگۋىرلەر ءۇش كۇن بويى مۇزداي سۋعا سۇڭگىپ, وزەن ءتۇبىن شارلاعانىمەن قارۋدى تاپپادى. اقىرى تاپانشانى ول الماتى قالاسىنان ساتىپ العانىن دالەلدەدىك. ازاماتتىڭ شىنىمەن قارۋعا يەلىك ەتكەنىن دالەلدەۋ ءۇشىن قانشاما ۋاقىتىمىز زايا كەتتى. وسىنداي جاعدايدا اسقان تاباندىلىق قاجەت. كەيبىر كۇدىكتىلەر تەرگەۋ بارىسىندا ءوزى ءۇشىن پايدالى ساتتەردى اڭعارسا, ول جايىندا جۇمعان اۋزىن اشپاي قوياتىنى بار, – دەيدى تەرگەۋشى.
نەگىزى اۋىر قىلمىستارعا كوبىنە ومىرلىك قيىندىقتار سەبەپ بولادى. الكوگولدى ىشىمدىك سالدارىنان قانقۇيلى قىلمىسقا بارۋ, قولىن قانعا مالۋ وقيعالارى دا از تىركەلمەيدى. سونداي كەزەڭدەردە تەرگەۋشىنىڭ ايەل بولعانى قىلمىستى تەرگەۋ بارىسىنا اسەر ەتەتىن كورىنەدى. كۇدىكتى ەر ازامات بولسا, ءتىپتى جاقسى. سەبەبى ەر ادام ايەلمەن اشىلىپ سويلەسۋگە بەيىم, ءوزىنىڭ بۇل ارەكەتكە بارۋ قۇپيالارىن ايتىپ قوياتىن كورىنەدى.
– كۇدىكتىمەن جاقىن ادامىنداي سىرلاسۋعا تىرىسامىن. كەيبىرى ىڭعايعا كونگىسى كەلمەي بۇلتاقتاپ, تەرگەۋ جۇمىستارىن جۇرگىزۋگە قىرسىعىن تيگىزەدى. ونداي ساتتەردە ازاماتتىڭ كوڭىلىنە جاعاتىن ىستەرگە بارۋعا تۋرا كەلەدى. مىسالى, ۋاقىتشا ۇستاۋ يزولياتورىندا جاقىندارىمەن كورىسۋىنە رۇقسات الىپ بەرەمىن دەسەڭ, يلىگەدى. سوتقا دەيىنگى تەرگەۋدىڭ ناتيجەسى ساراپتامانىڭ قانشا ۋاقىتتا اياقتالاتىنىنا دا بايلانىستى. ادەتتە ول كوبىنە 1 اي مەرزىمگە تاعايىندالادى. ال ايرىقشا جاعدايدا 7 ايعا دەيىن سوزىلۋى مۇمكىن. سوندىقتان بويىندا تاباندىلىق, توزىمدىلىك سەكىلدى قاسيەتتەر بولماسا, بۇل ماماندىقتا ۇزاققا شىداۋ مۇمكىن ەمەس. ونىڭ ۇستىنە قىلمىس كەز كەلگەن ۋاقىتتا بولادى, ءتۇن ورتاسىندا, تاڭ قاراڭعىسىندا حابار تۇسسە دە بىردەن وقيعا ورنىنا ءجۇرىپ كەتەسىڭ. ول جەردە تەرگەۋشىلەر پوليتسيانىڭ جەدەل ۋاكىلىمەن جانە كريميناليسپەن تىزە قوسىپ جۇمىس ىستەيدى. بارلىق نۇسقاۋلىقتى تەرگەۋشى بەرەتىنىن ايتىپ وتەيىن. سوندىقتان قىلمىسقا قاتىسى بار كەز كەلگەن دەتالدى نازاردان تىس قالدىرماۋعا تىرىسامىز. قىلمىس ورنىن تولىق قاراپ شىققان سوڭ عانا تەرگەۋدىڭ نەگىزگى شارالارىنا كىرىسەمىز. بايقايتىنىم, ۋاقىتىنىڭ كوبىن جۇمىستا وتكىزەتىندىكتەن, ەر-ازاماتتار بۇل قىزمەتتە كوپ تۇراقتاي المايدى. ءوزىم ءۇشىن بۇل ماماندىق جان قالاۋىم بولعاندىقتان قىزىقتى ءارى ءار قىلمىستىق ءىس – جازىلماعان ءبىر كىتاپ, – دەيدى كەيىپكەرىمىز.
پاۆلودار