پرەمەر-مينيستر ءاليحان سمايىلوۆتىڭ توراعالىعىمەن ورتالىق جانە جەرگىلىكتى مەملەكەتتىك ورگانداردىڭ ءوزارا ءىس-قيمىلى جونىندەگى ۇيلەستىرۋ شتابى سۋ تاسقىنى كەزەڭىنە قاتىستى احۋالدى قارادى, دەپ حابارلايدى Egemen.kz.
توتەنشە جاعدايلار ءمينيسترى يۋري يلين الدىن الۋ شارالارىنا قاراماستان, ەرىگەن جانە تاسقىن سۋلار سالدارىنان اباي, اقتوبە, اتىراۋ, باتىس قازاقستان, تۇركىستان جانە پاۆلودار وبلىستارىندا 163 تۇرعىن ءۇي مەن ءۇش عيماراتتى سۋ باسقانىن ايتتى. قازىرگى ۋاقىتتا اقتوبە وبلىسىندا 13 ءۇي, اتىراۋ وبلىسىندا ءبىر تۇرعىن ءۇي سۋ استىندا قالىپ وتىر.
سۋ باسۋ سالدارىن جويۋ ءۇشىن 3,5 مىڭنان استام ادام, 500-دەن استام تەحنيكا, 300 ءجۇزۋ جانە 300-گە جۋىق سۋ بۇرۋ قۇرالدارى تارتىلعان. رەسپۋبليكالىق جانە وبلىستىق جەدەل شتابتار شۇعىل قىزمەتتەر مەن ۇيىمداردىڭ قاتىسۋىمەن سۋ تاسقىنى بويىنشا احۋالدى باقىلايدى.
الدىن الا تالداۋعا سايكەس, ەلدى مەكەندەردەگى تۇرعىن ۇيلەردى سۋ باسۋ سەبەپتەرى – وزەندەردەگى سۋ دەڭگەيىنىڭ كوتەرىلۋى, قورعانىس بوگەتتەرىنىڭ قيراۋى, ازاماتتاردىڭ جەكە ۋچاسكەلەرىنەن قاردىڭ ۋاقىتىلى شىعارىلماۋى جانە جول استىنداعى سۋ وتكىزۋ قۇرىلىستارىنىڭ وتكىزۋ قابىلەتىنىڭ تومەن بولۋى.
سونىمەن قاتار يندۋستريا جانە ينفراقۇرىلىمدىق دامۋ ءمينيسترى مارات قاراباەۆ بايانداما جاسادى, ال وڭىرلەردە قابىلدانىپ جاتقان شارالار تۋرالى اقتوبە وبلىسىنىڭ اكىمى ەرالى توعجانوۆ, اقمولا وبلىسىنىڭ اكىمى ەرمەك مارجىقپاەۆ جانە سولتۇستىك قازاقستان وبلىسىنىڭ اكىمى ايداربەك ساپاروۆ باياندادى.
پرەمەر-مينيستر سۋ تاسقىنى پروبلەماسىن بەكىتىلگەن سۋ تاسقىنىنا قارسى ءىس-شارالاردى جانە ءتيىستى جول كارتاسىن ىسكە اسىرۋ, سونداي-اق مەملەكەتتىك ورگاندار اراسىنداعى ءتيىمدى ءوزارا ءىس-قيمىل ارقىلى كەشەندى تۇردە شەشۋ قاجەتتىگىن اتاپ ءوتتى.
قازىر ەلىمىزدىڭ سولتۇستىك وڭىرلەرىندە اۋا تەمپەراتۋراسى جوعارىلاپ كەلەدى, بۇل قالىڭ قاردى ەرىتىپ, جاڭا تاۋەكەلدەردىڭ پايدا بولۋىنا اكەلەدى. وسىعان بايلانىستى ءاليحان سمايىلوۆ اسا قاۋىپتى ۋچاسكەلەردىڭ ماڭىندا ارنايى تەحنيكا مەن ينەرتتى ماتەريالدار قورلارىن شوعىرلاندىرىپ, وزەندەردەگى مۇز جارۋ جۇمىستارىن جالعاستىرۋ جانە كولىك قاتىناسى توقتاپ قالۋى مۇمكىن ەلدى مەكەندەردى الدىن الا انىقتاۋ قاجەتتىگىن اتاپ ءوتتى.
پرەمەر-مينيستر ەلدى مەكەندەرگە قاۋىپ تونگەندە نەمەسە سۋ باسقان كەزدە, سونداي-اق قاۋىپتى ايماقتاردان كوشىرۋ كەزىندە نە ىستەۋ كەرەكتىگى تۋرالى حالىقتى حاباردار ەتۋ جۇمىستارىن كۇشەيتۋ كەرەكتىگىن ايتتى.
«حالىقپەن ناقتى كەرى بايلانىس ورناتىپ, ولاردىڭ كومەك بەرۋ تۋرالى وتىنىشتەرىنە دەرەۋ جاۋاپ بەرۋ قاجەت», دەدى ءاليحان سمايىلوۆ.
ۇكىمەت باسشىسىنىڭ ايتۋىنشا, كەلەسى سۋ تاسقىنى كەزەڭىنە دايىندىقتى قازىردەن باستاۋ كەرەك: ەلدى مەكەندەردىڭ ماڭىنا بوگەتتەر تۇرعىزىپ, سۋ وتكىزۋ قۇرىلىستارى مەن ارىقتاردى دەر كەزىندە تازارتۋ, سونداي-اق سۋ بۇرۋ كانالدارىن دايىنداۋ قاجەت. سونىمەن بىرگە گيدروتەحنيكالىق قۇرىلىستاردىڭ, بوگەتتەردىڭ جاعدايىن تەكسەرىپ, قاجەت بولسا, ولاردى جوندەۋ بويىنشا شارالار قابىلداۋ كەرەك.
«اكىمدىكتەر جولدار مەن كوپىرلەردىڭ, ەلەكتر جەلىلەرىنىڭ قيراعان ۋچاسكەلەرىن قالپىنا كەلتىرىپ قانا قويماي, ورىن العان جاعدايعا تالداۋ جۇرگىزىپ, كەلەسى سۋ تاسقىنى كەزىندە بولۋى مۇمكىن قاۋىپ-قاتەرلەردى ەسكەرۋلەرى قاجەت. تجم الداعى جىلدارعا ارنالعان ەلدى مەكەندەردى سۋ تاسقىنىنان قورعاۋ جونىندەگى ءىس-شارالار كەشەنىن تولىقتىرۋى ءتيىس», دەدى ءاليحان سمايىلوۆ.
سونىمەن قاتار پرەمەر-مينيستر جىلۋ بەرۋ ماۋسىمى ماسەلەسىنە توقتالدى. ۇكىمەت باسشىسى قىستا ەكىباستۇزدا, رۋدنىيدا جانە ريددەردە بولعان جاعدايدى ەسكە سالدى, وندا تۋىنداعان ماسەلەلەردى سول بەتتە شەشۋگە تۋرا كەلگەن ەدى.
ء«سوز جوق, وتكەن قىس مەزگىلى جىلۋ ەنەرگەتيكاسىندا, اسىرەسە, جىلۋ جەلىلەرى مەن جىلۋ ستانتسيالارىندا, قازاندىقتاردا پروبلەمالاردىڭ جيناقتالىپ قالعانىن كورسەتتى. كەيبىر وڭىرلەردە كومىردى ۋاقىتىلى جەتكىزۋ مەن قامتاماسىز ەتۋ بويىنشا پروبلەمالار دا تۋىندادى. بۇل – جۇيەلى تۇردە جۇرەتىن جىل سايىنعى جۇمىس. وندا ەشقانداي ىركىلىستەر مەن كەمشىلىكتەر بولماۋى ءتيىس ەدى», دەدى ءاليحان سمايىلوۆ.
ۇكىمەت باسشىسىنىڭ ايتۋىنشا, جابدىقتاردىڭ تەحنيكالىق جاعدايىن تۇراقتى, كەشەندى جانە وبەكتيۆتى باعالاۋ جۇرگىزىلمەگەن. وسىعان بايلانىستى بيىل ۇكىمەت پەن جەرگىلىكتى اتقارۋشى ورگاندار جابدىقتار مەن جەلىلەردى جوندەۋ بويىنشا ءتيىستى جوبالاردى باسىم تارتىپپەن قارجىلاندىرۋدى قامتاماسىز ەتۋ كەرەك.
ءاليحان سمايىلوۆتىڭ سوزىنشە, بيىلدان باستاپ ەنەرگەتيكالىق باقىلاۋ جۇمىسى كۇشەيتىلمەك, ونىڭ شتات سانى 75 ادامعا ۇلعايتىلادى, سونداي-اق زاڭ جۇزىندە ەنەرگيا وبەكتىلەرىنە جوسپاردان تىس تەكسەرۋلەر جۇرگىزۋ قۇقىعى بەرىلەتىن بولادى.
«كوممۋنالدىق مەنشىكتەگى جەلىلەر مەن جىلۋ ەلەكتر ورتالىقتارىن جەرگىلىكتى اتقارۋشى ورگاندار قارجىلاندىرۋعا ءتيىس. ال جەكە مەنشىكتەگى جىلۋ ورتالىقتارىن رەكونسترۋكتسيالاۋدى مەنشىك يەسىنىڭ قاراجاتى ەسەبىنەن جۇرگىزۋ كەرەك», دەدى پرەمەر-مينيستر.
جالپى ۇكىمەت باسشىسىنىڭ پىكىرىنشە, ينجەنەرلىك جەلىلەردىڭ جاي-كۇيىن جانە جوندەۋ جۇمىستارىن جۇرگىزۋدى باقىلاۋدى كۇشەيتۋ, سونداي-اق ەنەرگيا وبەكتىلەرى يەلەرىنىڭ جاۋاپكەرشىلىگىن ارتتىرۋ كەرەك – وسىلاردىڭ بارلىعى شارتتاردا جازىلۋى قاجەت.