قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى Qasqa Jol Youtube ارناسىنا بەرگەن سۇحباتىندا بالالاردىڭ ورازا ۇستاۋىنا قاتىستى داۋلى ماسەلەگە پىكىر ءبىلدىردى, دەپ حابارلايدى Egemen.kz.
«شاريعات بويىنشا باليعات جاسىنا تولعان, دەنى ساۋ ادام ورازا ۇستاۋعا مىندەتتى. ال بالالارعا كەلسەك, ەگەر باليعات جاسقا تولماسا, مىندەتتى ەمەس. ورازا ۇستاۋ, ناماز وقۋ – بىرەۋگە كورسەتۋ ءۇشىن جاسالاتىن قۇلشىلىق ەمەس. مەن ءوزىم ون جاسىمنان باستاپ اۋىز بەكىتكەنمىن. ول كەزدە ءتىپتى اتا-انامىز ۇستامايتىن. العاشىندا ءۇش كۇننەن باستاپ, كەيىن تولىقتىرىپ ۇستاپ ۇيرەندىك. ياعني, باليعات جاسىنا تولماستان ۇستادىق. ەگەر ءبىر بالا باليعاتقا تولماي ۇستايمىن دەسە, دەنساۋلىعىنا زيان كەلمەسە, باسقا دا قيىنشىلىقتار تۋدىرماسا, ونى جازالاۋ دا دۇرىس ەمەس. بىزگە «مەكتەپتە ۇيىقتاپ جاتتى» دەپ حابارلاسقان ادامدار بولدى. ارينە, بالا السىرەسە, ساباعى دۇرىس بولماسا, ءوزى باليعات جاسىنا تولماسا, ارينە, ولاي بالانىڭ دەنساۋلىعىنا زيان تيگىزۋ دۇرىس ەمەس. ال بالاعات جاسىنا تولعان ادامعا ورازا ۇستاۋ قيىندىق تۋدىرمايدى», دەدى ناۋرىزباي تاعان ۇلى.