ناۋرىز مەرەكەسى شۋ اۋداندىق ورتالىق اۋرۋحاناسىندا كەڭ كولەمدە اتالىپ ءوتتى. ناۋرىز-دوداعا ءار ءبولىم ۇجىمى, اتاپ ايتساق, بمسك, كدە, تەراپيا, حيرۋرگيا, جۇقپالى اۋرۋلار, پەرزەنتحانا, قابىلداۋ بولىمدەرى قاتىستى. ولار قازاقتىڭ سالت-داستۇرلەرى – بەسىككە بولەۋ, تۇساۋكەسەر, قىز ۇزاتۋ, بەتاشاردى ناقىشىنا كەلتىرە كورسەتىپ, ۇلتتىق كيىمدە ءان ايتىپ, بي بيلەۋدەن ونەر جارىستىردى.
سونىمەن اتالعان مەرەكەلىك بايقاۋدا جۇقپالى اۋرۋلار ءبولىمى كيمەشەكپەن اجەلەر ءبيىن بيلەپ, جاندى داۋىستا ءان ايتىپ, باس جۇلدەگە يە بولدى. اۋرۋحانانىڭ باس دارىگەرى جايدار ايتىشەۆ جەڭىمپازدارعا باعالى سىيلىقتار تاپسىرىپ, ۇلتتىق مەرەكەمەن قۇتتىقتادى.
«كوكتەمنەن حابار بەرىپ, جىلۋلىقتىڭ, تابيعاتتىڭ تويى سانالاتىن ءاز ناۋرىزدىڭ قازاق حالقى ءۇشىن ماڭىزى زور. بۇل كۇن جالپىۇلتتىق بىرلىكتىڭ, تاتۋلىقتىڭ, جاقسىلىق پەن مەيىرىمنىڭ نىشانى ىسپەتتەس. ۇلىق مەرەكەنى ۇلىقتاۋعا اۋرۋحانا ۇجىمى دا اتسالىسىپ جاتىر. اق حالات كيگەن ابزال جاندارعا كيمەشەك تە جاراساتىنىن كوردىك. مىڭ-سان جىلدان بەرى جالعاسقان سالت-داستۇرلەرىمىزگە كۋا بولدىق. ناۋرىز-دودادا وق بويى وزا شاۋىپ, جەڭىمپاز اتانعان ارىپتەستەرىمدى قۇتتىقتايمىن», دەدى باس دارىگەر ج.ايتىشەۆ.
قىزمەتكەرلەر مەن اۋرۋحانا ەمدەلۋشىلەرىنە ناۋرىز كوجە تاراتىلىپ, مول داستارقان جايىلدى.
سونداي-اق ورتالىق الاڭداعى مەرەكەلىك جيىندا اتالعان اۋرۋحانا اتىنان اۋدان تۇرعىندارىنا ناۋرىز كوجە, پالاۋ, ءتۇرلى تاتتىلەر تاراتىلدى.