ەلدىڭ تۇكپىر-تۇكپىرىندەگىدەي اقتاۋدا دا بۇگىن پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋى ءوتىپ جاتىر. تۋعان قالاسىنىڭ, وبلىستىڭ, سونداي-اق بۇكىل ەلدىڭ قوعامدىق-ساياسي ومىرىنە قاتىسۋ مۇمكىندىگىن ءاربىر كامەلەتكە تولعان قازاقستاندىق پايدالانا الادى, دەپ حابارلايدى Egemen.kz.
ورالباەۆتار وتباسىنىڭ مۇشەلەرى - دىنمۇحامەد پەن ولگا ەرەكشە مۇقتاج جاندار. ولار ەستىمەيدى. ولگا ورالباەۆا ۇلكەن قىزىمەن شاشتاراز ماماندىعىن ۇيرەنىپ, قازىر سۇلۋلىق سالونىندا جۇمىس ىستەيدى. ەكى كىشى قىزى ءالى وقۋ ورىندارىندا ءبىلىم الادى. تاڭەرتەڭ ولار دا باسقا سايلاۋشىلار سياقتى سۋردواۋدارماشىمەن سايلاۋ ۋچاسكەسىنە كەلىپ داۋىس بەرىپ, ازاماتتىق ۇستانىمدارىن ءبىلدىردى.
«سايلاۋ – بۇل ءوز داۋىسىڭىزدى بەرۋ جانە قازاقستاننىڭ قوعامدىق ومىرىنە قاتىسۋ مۇمكىندىگى. ءبىز ءۇشىن ەلىمىزدىڭ بولاشاعى ماڭىزدى, سوندىقتان ءبىز وسىندا كەلدىك», دەدى ولگا ورالباەۆا.
جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنشە, ماڭعىستاۋ وبلىسىندا 418 002 سايلاۋشى تىركەلگەن, ونىڭ 20 579-ى ءارتۇرلى توپتاعى مۇگەدەكتەر. ولاردىڭ 7970-ءى ەرەكشە قاجەتتىلىكتەرى بار: 992-ءسى كورۋ, 580-ءى ەستۋ, 5542-ءسى تىرەك-قيمىل اپپاراتى بۇزىلعان, 856-سى مۇگەدەكتەر ارباسىن پايدالانادى. 127 سايلاۋ ۋچاسكەسى ەرەكشە قاجەتتىلىكتەرى بار ادامداردىڭ كىرۋى ءۇشىن تولىق جابدىقتالعان, 49 نىسان جارتىلاي قولجەتىمدى.