اقمولالىقتاردىڭ بەلسەندىلىگى جوعارى

تاڭعى ساعات ونعا دەيىن سايلاۋشىلاردىڭ 15,1 پايىزى داۋىس بەرىپ ۇلگەردى. بەلسەندىلىك ءبىرشاما جوعارى. بۇل كەزدە وبلىستار اراسىندا ەكىنشى مەجەدە بولدى. وبلىس ورتالىعى مەن شالعايداعى شاعىن اۋىلداردا بەلسەندىلىك جوعارى. ايتالىق, ءبىرجان سال اۋدانىنداعى 31 سايلاۋ ۋچاسكەسىندە 9465 سايلاۋشى تىركەلگەن بولسا, ساعات ونعا دەيىن 3124 ادام ءوز تاڭداۋىن جاساپ ۇلگەردى.

«سايلاۋشىلاردىڭ بەلسەندىلىگى ءبىرشاما جوعارى. سەنبى – دەمالىس كۇنى بولعاندىقتان اسىقپاي كەلىپ جاتقاندار دا بار. ساياسي پارتيالار مەن قوعامدىق بىرلەستىكتەردىڭ بايقاۋشىلارى سايلاۋ بارىسىن قاداعالاپ وتىر», دەيدى اۋداندىق ىشكى ساياسات ءبولىمىنىڭ جەتەكشىسى مىرگۇل اياعانوۆا.

ەل ازاماتتارىنىڭ ءوز سايلاۋ ۋچاسكەلەرىنە بارىپ, داۋىس بەرۋلەرىنە بارلىق جاعداي جاسالعان. ناقتىراق ايتساق, قالالىق جانە اۋداندىق اۆتوبۋس باعىتتارى ءوڭىردىڭ بارلىق ەلدىمەكەندەرىن قامتيدى. ءتىپتى, استانا قالاسىنىڭ ماڭىنداعى ەلدىمەكەندەردە جول ءجۇرۋ تەگىن.

قيانداعى قورعالجىن اۋدانىندا دا ايماق تۇرعىندارى ساياسي بەلسەندىلىك تانىتىپ جاتىر. بۇل اۋداندا ۇيىمداستىرىلعان 17 سايلاۋ ۋچاسكەسىنە 5216 سايلاۋشى تىركەلگەن. قورعالجىن اۋداندىق ءماسليحاتىنا 28 ۇمىتكەر بار. سايلاۋ بارىسىن «امانات» پارتياسى مەن «داۋىس» قوعامدىق بايقاۋشىلارى كواليتسياسى باقىلاۋدا. بۇل اۋداندا ساعات 11-گە دەيىن سايلاۋشىلاردىڭ 1176-سى نەمەسە 22,5 پايىزى داۋىس بەرىپ ۇلگەردى.

وبلىس ورتالىعىندا دا ساياسي ناۋقان بارىسىندا جالپاق جۇرتتىڭ ەل ەرتەڭىنە زور سەنىممەن قارايتىنىن اڭعارۋعا بولادى. اقمولا وبلىستىق سايلاۋ كوميسسياسىنىڭ توراعاسى ماناربەك ءسادۋوۆتىڭ مالىمدەۋىنشە, ساعات 12-گە دەيىن وڭىردەگى 517714 سايلاۋشىنىڭ 33,63 پايىزى داۋىس بەرىپ ۇلگەرگەن.