كەنتاۋ قالاسىنىڭ تۇرعىنى, كوپبالالى انا تۇيمەگۇل ەرگەشقىزى ت.رىسقۇلوۆ اتىنداعى 24 مەكتەپتەگى №899 سايلاۋ ۋچاسكەسىنە وتباسىمەن كەلىپ, ءوز تاڭداۋىن جاسادى, دەپ حابارلايدى Egemen.kz.
تۇيمەگۇل ەرگەشقىزى ەڭ العاشقى ءسابيدى وسىدان 22 جىل بۇرىن اسىراپ الۋعا شەشىم قابىلداعان. سودان كەيىن وتباسى جىل سايىن تولىعا باستاعان. ءوزى ۇلكەن وتباسىندا وسكەن تۇيمەگۇل ەرگەشقىزى ۇيدە بالانىڭ كوپ بولعانىن قالايدى. ءوز كاسىبى – كافە جانە دۇكەن ورتالىقتارى بار انانىڭ 18 بالاسى جانە 6 نەمەرەسى بار.
ال تۇركىستان وبلىسىنىڭ اكىمى دارحان ساتىبالدى تۇركىستان قالاسىنداعى №133 سايلاۋ ۋچاسكەسىنە بارىپ, داۋىس بەرگەن. بۇل ۋچاسكەدە 2 مىڭنان استام سايلاۋشى تىركەلگەن. اتالعان اۋماقتا سايلاۋشىلاردىڭ بەلسەندىلىگى وتە جوعارى.
جالپى وبلىستا 1168658 سايلاۋشى بار. بۇل – رەسپۋبليكا بويىنشا ەڭ جوعارعى كورسەتكىش. وڭىردەگى 941 سايلاۋ ۋچاسكەسىندە 8 مىڭنان استام بايقاۋشى جۇمىس ىستەپ جاتىر.