كەنتاۋدا اق كيمەشەك كيىپ, ۇلتتىق قۇندىلىعىمىزدى دارىپتەگەن انالار سايلاۋ ۋچاسكەسىندەگى باقىلاۋشىلار مەن داۋىس بەرۋشىلەرگە ناۋرىز كوجە, باۋىرساق, قۇرت-ىرىمشىك ۇلەستىردى, دەپ جازادى Egemen.kz.
وسىلايشا كەنتاۋ قالالىق ارداگەرلەر ۇيىمى جانىنان قۇرىلعان «اجەلەر القاسىنىڭ» ءتورايىمى روزا جۇماباەۆا باستاعان اجەلەر كوپشىلىكتى ناۋرىز مەرەكەسىمەن قۇتتىقتادى.
«ەل ءۇشىن قىزمەت ەتەتىن ادامداردى تاڭداۋ - ەل بولاشاعىنىڭ جارقىنى. سول سەبەپتى بۇل كۇن ماڭىزدى ءارى ەلىمىز ءۇشىن مەرەكە. ەلىمىزدە تەك جاقسىلىق ورناسىن», دەپ روزا اجە اق باتاسىن بەردى.
كەنتاۋ قالاسىندا 35 سايلاۋ ۋچاسكەسى جۇمىس ىستەپ تۇر. جالپى 56 172 سايلاۋشى داۋىس بەرەدى دەپ كۇتىلۋدە.
ال سوزاق اۋدانىندا ۇلى وتان سوعىسىنىڭ ارداگەرى مىرزاحمەت جىلىسباەۆ العاشقىلاردىڭ ءبىرى بولىپ سىزعان اۋىل وكرۋگىندەگى №701 سايلاۋ ۋچاسكەسىنە كەلىپ, ءوز تاڭداۋىن جاسادى. سانالى عۇمىرىن اۋداننىڭ دامۋىنا جۇمساپ, ەلگە قىزمەت ەتكەن ارداگەر بۇگىنگى ماڭىزدى ساياسي ناۋقان جوعارى دەڭگەيدە, ءادىل ءوتسىن دەپ باتا بەردى.
«ەل بولاشاعى ءۇشىن ءاربىر ازامات داۋىسى ماڭىزدى. سوندىقتان مەن دە جاسىم 90-نان اسقانىنا قاراماستان تاڭسارىدەن كەلىپ ءوز تاڭداۋىمدى جاساپ, ساياسي ناۋقاننان شەت قالمادىم. قاشاندا ەلىمىز امان, بەيبىتشىلىك زامان بولسىن», دەپ اقساقال ىزگى اق تىلەگىن جەتكىزدى.
ايتا كەتەلىك, العاشقى داۋىس بەرۋشى بەلسەندى ازاماتتارعا سايلاۋ ۋچاسكەلەرىندە سىي-سياپات جاسالىپ, مەرەكەلىك قۇتتىقتاۋلار ۇيىمداستىرىلدى.