قازاقستان رەسپۋبليكاسى پارلامەنتى ءماجىلىسى مەن ءماسليحاتتارى دەپۋتاتتارىنىڭ كەزەكتەن تىس سايلاۋى قاراقيا اۋدانىندا ءدال ۋاقىتىندا باستالدى, دەپ حابارلايدى Egemen.kz.
تاڭعى ساعات 7:00-دە سايلاۋشىلارعا ەسىگىن ايقارا اشقان داۋىس بەرۋ ۋچاسكەلەرىندە قر ءانۇرانى سالتاناتتى تۇردە ورىندالدى.
قۇرىقتا ءدال قازىر كۇن اشىق, تۇرعىندار دا كوتەرىڭكى كوڭىل-كۇيمەن كەلىپ, ەل بولاشاعى ءۇشىن ءوز تاڭداۋلارىن جاساۋدا. تاڭنان تۇرىپ 145 سايلاۋ ۋچاسكەسىنە ءبىرىنشى بولىپ كەلگەن بىرنەشە سايلاۋشى ارنايى سىيلىققا يە بولدى.
ايتا كەتەيىك, قاراقيا اۋدانى بويىنشا 18 سايلاۋ ۋچاسكەسى جۇمىس ىستەپ تۇر. ولار تاڭعى 7:00-دەن كەشكى ساعات 20:00-گە دەيىن سايلاۋشىلاردى ۇزدىكسىز قابىلدايدى.
اۋدان بويىنشا 20 306 سايلاۋشى بار. قاراقيادا وبلىستىق جانە اۋداندىق ءماسليحات دەپۋتاتتارىنىڭ سايلاۋىنا بارلىعى 44 كانديدات تىركەلدى. ونىڭ ىشىندە ماڭعىستاۋ وبلىسىنىڭ ءماسليحاتىنا 4 كانديدات, قاراقيا اۋداندىق ءماسليحاتىنا 40 كانديدات تىركەلگەن.