ەلىمىز بويىنشا ءوتىپ جاتقان پارلامەنت ءماجىلىسى مەن ءتۇرلى دەڭگەيدەگى ءماسليحاتتاردىڭ دەپۋتاتتارىن سايلاۋ جاڭاوزەندە جەرگىلىكتى ۋاقىتپەن تاڭەرتەڭگى ساعات 7.00-دە باستالدى, دەپ حابارلايدى Egemen.kz.
جاڭاوزەندە 38 سايلاۋ ۋچاسكەسى جۇمىس ىستەپ تۇر. و.تۇرماعانبەت ۇلى اتىنداعى «ماڭعىستاۋ يندۋستريالدى تەحنيكالىق» كوللەدجىندە ورنالاسقان №79 سايلاۋ ۋچاسكەسىندە جاس كاسىپكەر اسىلانبەك دوسان ەڭ ءبىرىنشى بولىپ ءوز تاڭداۋىن جاسادى. سايلاۋعا بەلسەندى تۇردە قاتىسىپ, داۋىس بەرۋ ءار قازاقستاندىقتىڭ ازاماتتىق بورىشى دەپ ەسەپتەيتىن كاسىپكەر سايلاۋ ماڭىزدى قادامداردىڭ ءبىرى دەيدى.
«قالامىزدىڭ دامۋى بارىسىندا ءماسليحات دەپۋتاتتارىن سايلاۋ, ودان ءارى ەلىمىزدىڭ دامۋى ءۇشىن زاڭ جوبالارىن ۇسىنۋشى, دايىنداۋشى پارلامەنتتىڭ ءماجىلىس دەپۋتاتتارىن سايلاۋ ەلىمىز ءۇشىن اسا ماڭىزدى دۇنيە دەپ بىلەمىن. بۇل سايلانۋشى دەپۋتاتتار قاراپايىم حالىقتىڭ ءۇنىن تىڭدايتىن, سولارمەن ساناساتىن, وسى حالىقتى بيلىكپەن بايلانىستىرۋشى «زۆەنو» بولۋى قاجەت. سوندىقتان دا كانديداتتار وزدەرىنە قانداي اۋىر جۇك تۇسەتىنىن بىلەدى جانە سوعان دايىن دەپ ويلايمىن. ولارعا ساتتىلىك, كۇش جىگەر, شىدامدىلىق پەن ادالدىق تىلەيمىن», دەدى ا.دوسان.