قازاقستاندىق كاسىپكەرلەر استانانىڭ قايتا اتالۋىنا بايلانىستى ميلليونداعان ايىپپۇل تولەۋگە ءماجبۇر. رەسەيلىك Wildberries ماركەتپلەيس جۇيەسىندە قاتەلىك بولعان, ول ارقىلى وتاندىق ساتۋشىلار ءوز تاۋارلارىن ساتادى. ەلوردانىڭ 500-دەن استام تۇرعىنى تاۋارلارىن الۋ ءۇشىن قايدا جۇگىنۋ كەرەكتىگىن جانە ادىلدىككە قالاي قول جەتكىزۋ كەرەكتىگىن بىلمەي وتىر, دەپ حابارلايدى Egemen.kz «استانا» تەلەارناسىنا سىلتەمە جاساپ.
15 ناۋرىزدا ەلوردالىق كاسىپكەرلەر ماسەلەنىڭ انىق-قانىعىن ءبىلۋ ءۇشىن استاناداعى كومپانيا قويماسىنىڭ جانىنا جينالدى. ولاردىڭ ايتۋىنشا, سايتتىڭ تەحنيكالىق قولداۋى وتىنىشتەرگە جاۋاپ بەرمەي تۇر.
«Wildberries وكىلدەرىنىڭ ايتۋىنشا, بارلىق تاۋار باسقا قويماعا جونەلتىلگەن. باسقا قانداي قويما؟ بىزدە ول جالعىز. ەشكىم ەشتەڭە بىلمەيدى. بىرەۋگە 20 مىڭ, بىرەۋگە ميلليون, بىرەۋگە 14 ميلليون ايىپپۇل كەلدى. 25 پايىز الىپ قانا قويماي, ايىپپۇلدى دا تولەۋىمىز كەرەك پە؟!», دەدى كاسىپكەر مارينا گونچارەنكو.
قازاقستاندىق كاسىپكەرلەر رەسەيلىك كومپانيانىڭ قويماسىنا كىرە المادى. ال قويما كۇزەتشىسى باسشىلىق ديالوگ جۇرگىزۋدەن باس تارتقانىن جەتكىزدى.ايتا كەتسەك, اتالمىش كومپانيانىڭ قازاقستانداعى رەسمي وكىلدىگى جوق. زاڭگەر شىڭعىس تەمىر كومپانيانىڭ قىزمەتكەرىمەن بايلانىسىپ, جاعدايدى تۇسىندىرۋگە تىرىستى.
«قويمانى تاڭداۋ كەزىندە جۇيە نۇر-سۇلتان قويماسىن اۆتوماتتى تۇردە تاڭداعان, نەگىزى استانا قويماسىن تاڭداۋ قاجەت بولعان. بۇل - تەحنيكالىق ماسەلە. ەندى ماركەتپلەيس وسى ەسەپتەۋلەردى قايتا قاراۋعا دايىن ەكەندىگى تۋرالى اقپارات كەلىپ ءتۇسىپ جاتىر. الايدا «مەرەكە قارساڭى», «مەرەكەدەن كەيىن» دەپ ءجۇرىپ, اقشا قايتارىلماۋى دا مۇمكىن», دەدى زاڭگەر.
ساۋدا جانە ينتەگراتسيا مينيسترلىگى وتاندىق كاسىپكەرلەرگە كومەكتەسە المايتىندارىپ ايتىپ, ايىپپۇلدارعا قاتىستى سوتقا جۇگىنۋگە كەڭەس بەردى.
«كەيبىر زاڭنامالىق اكتىلەرگە ەلەكتروندىق ساۋدا شەڭبەرىندە تۇتىنۋشىلاردىڭ قۇقىقتارىن قورعاۋ, سونداي-اق قازاقستان رەسپۋبليكاسىنىڭ اۋماعىندا قولدانىلاتىن ساۋدا الاڭدارىنىڭ قىزمەتىن رەتتەۋ بولىگىندە وزگەرىستەر, تولىقتىرۋلار ەنگىزۋ بويىنشا جۇمىستار جۇرگىزىلىپ جاتىر. وسىنىڭ اياسىندا ماركەتپلەيستەر جوسىقسىز تاجىريبەلەردىڭ تاۋەكەلدەرىن جويۋ بويىنشا ءتيىستى شارالار قابىلدايدى», دەپ ءتۇسىندىردى متي تسيفرلاندىرۋ دەپارتامەنتى ديرەكتورىنىڭ ورىنباسارى رۋسلان ورازاليەۆ.
ونىڭ ايتۋىنشا, بۇل تۇزەتۋلەر قوعامدىق تالقىلاۋلاردان ءوتتى جانە جاقىن ارادا ۇكىمەتتىڭ قاراۋىنا جىبەرىلەدى.