قار كوبەسى سوگىلدى دەگەنشە, تاسقىن قاۋپى كۇشەيەدى. قاپى قالماس ءۇشىن قارەكەت قاجەتتىگىن بۇرناعى جىلدار ۇدايى ەسكە سالىپ ءجۇر. قارعىننان قاتەر ازىرگە قاراعاندىعا تونگەن جوق. قاراعاندى وبلىستىق توتەنشە جاعدايلار دەپارتامەنتىنىڭ مالىمدەۋىنشە, ايماقتا جاعداي بۇگىندە بىرقالىپتى.
وبلىس اۋماعىنىڭ 75 پايىزىن قار باسىپ جاتىر. تەك نۇرا وزەنىندە كەيىنگى جىلدارداعى نورمامەن سالىستىرعاندا جيناقتالعان سۋ قورى 28 پايىزعا ارتىق. وزگەسىندە نورمادان 3-10 پايىزعا تومەن. ولاردا سەڭ جۇرگەندە ارناسىنان اسىپ كەتپەۋى ءۇشىن سىرەسكەن كوك مۇزدى بۇرعىلاۋ ءجۇرىپ جاتىر. بۇدان بولەك, سۋ وتەتىن قۇبىرلار, ارىقتار ارشىلۋدا.
– عارىشتان باقىلاۋ قازىرگى ۋاقىتتا وبلىس اۋماعىنىڭ 75 پايىزى قار استىندا جاتقانىن كورسەتتى. نۇرا وزەنى باسسەينىندە سۋ قورى كەيىنگى جىلدارداعى ورتاشا ەسەپتەن 28 پايىزعا جوعارى, ال قالعان وزەندەردە 3-10 پايىزعا نورمادان تومەن. وبلىستاعى ءىرى سۋ قويمالارىنان سۋ جىبەرىلۋدە. اتاپ ايتقاندا, سامارقاند جانە ىنتىماق سۋ قويمالارىنان سەكۋندىنا 5-8 تەكشە مەتر سۋ جىبەرىلەدى. ەلدى مەكەندەردەن 2,1 ملن. تەكشە مەتر قار شىعارىلدى. سۋ باسۋ قاۋپى بار ايماقتاردا الدىن الۋ جۇمىستارى جالعاسۋدا, دەيدى توتەنشە جاعدايلار دەپارتامەنتىنىڭ باسشىسى مۇرات قاتپانوۆ.
بۇقار جىراۋ اۋدانى مەن تەمىرتاۋ قالاسىنىڭ ماڭىنداعى نۇرا وزەنىندە مۇز كەپتەلىستەرىنىڭ الدىن الۋ ءۇشىن مۇزدى كەسۋ جانە بۇرعىلاۋ جۇمىستارى قاۋىرت جۇرگىزىلۋدە. مۇز جامىلعىسىنىڭ السىرەۋى دە مۇزدىڭ جىلجۋى كەزىندە وزەننىڭ تولىپ كەتۋىنە جول بەرمەيدى. سۋ تاسقىنى قاۋپى بار وڭىرلەردە الدىن الۋ شارالارى جالعاسۋدا. 110 شاقىرىم سۋ بۇرۋ ترانشەيالارى تارتىلدى. 158 شاقىرىم كانالدار مەن ارىقتار تازارتىلدى. 3 286 بىرلىك سۋ وتكىزگىش قۇبىرلار مەن 281 كوپىر تازارتىلدى.
جالپى, جاريا ەتىلگەن دەرەكتەرگە سۇيەنسەك, وڭىردە 150-گە جۋىق ەلدى مەكەن مەن 100-گە جۋىق كولىك جولىنا قىزىل سۋدان قاۋىپ بار. جەردىڭ توڭى ورتاشا ەسەپپەن 160 سم-گە جۋىقتايدى. وبلىس بويىنشا توتەنشە جاعدايدىڭ الدىن الۋ ءۇشىن بيۋدجەتتەن 3 ميلليارد تەڭگە بولىنگەن. تاسقىنعا توسقىن قويۋ ءۇشىن 3,5 مىڭعا جۋىق ادام جانە 1 200 تەحنيكا ساقاداي-ساي.
وبلىس اكىمى ەرماعانبەت بولەكپاەۆ تاراپىنان الدىن الۋ شارالارى بويىنشا قۇزىرلى ورگاندارعا ناقتى تاپسىرمالار بەرىلدى.
–تاسقىن سۋلاردىڭ اپاتسىز ءوتۋى ءۇشىن سۋ بۇرۋ, ارىقتار جۇيەلەرىنىڭ دايىندىعىن بارلىق جەردە قامتاماسىز ەتۋ قاجەت. سونداي-اق جەكە اۋماقتاردى قار مەن قوقىستان تازارتۋ جونىندە حالىقپەن ءتۇسىندىرۋ جۇمىستارىن جانداندىرىڭىز, دەدى ءوڭىر باسشىسى. سونىمەن قاتار بارلىق گيدروقۇرىلىستىڭ دايىندىعى مەن جۇمىسى تۇراقتى باقىلاۋدا. اپتانىڭ سوڭىنا دەيىن اۆتوجولدارداعى سۋ وتكىزۋ قۇرىلىستارىن تازالاۋدى اياقتاۋ قاجەت.
نەگىزى, دەپارتامەنت تاراپىنان باسقارۋ ۇيىمدارى ءۇشىن تاسقىنعا قاتىستى جۇمىس الگوريتمى جاسالعان. ەلدى مەكەندەردە توتەنشە جاعداي تۋىنداعاندا باسشىلىققا الاتىن نۇسقاۋلىقتار ءازىر.
قاراعاندى وبلىسى