ەلوردادا قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى ورازاعا وراي باق وكىلدەرىنىڭ قاتىسۋىمەن وتكەن ءباسپاسوز ءماسليحاتىندا كاسىپكەرلەرگە ۇندەۋ جاسادى, دەپ حابارلايدى Egemen.kz.
«وسى رەتتە كاسىپكەر ازاماتتاردى, ساۋدا ورتالىقتارىنىڭ باسشىلارىن قاسيەتتى ايدىڭ قۇرمەتى ءۇشىن حالقىمىزدىڭ تۇرمىس جاعدايىن ەسكەرىپ, الەۋمەتتىك ماڭىزى بار تاۋارلار مەن ازىق-ت ۇلىك باعاسىن مۇمكىندىگىنشە 10 پايىزعا دەيىن تومەندەتىپ, جەڭىلدىك جاساۋعا ۇندەيمىن. جاقسى امالدارىڭىز وزدەرىڭىزگە ەسەلەپ جاقسىلىق بولىپ قايتاتىنىندا كۇمان جوق. مۇندايدا حالقىمىز: «قايىرىمدىلىق جاساساڭ – قايىرىن ءوزىڭ كورەسىڭ» دەمەي مە؟! پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «كىمدە-كىم باۋىرىنىڭ قاجەتىن وتەسە, اللا ونىڭ قاجەتىندە بولادى. كىمدە-كىم مۇسىلماننىڭ ءبىر قايعىسىن سەيىلتسە, اللا ونىڭ قايعى-قاسىرەتتەرىنىڭ ءبىرىن سەيىلتەدى» دەگەن. وسى ءساتتى پايدالانىپ, بارشا قاۋىمعا قاسيەتتى رامازان ايىندا اراق-شاراپ ىشىلمەسە جانە دۇكەندەردە ساتىلماسا, مۇمكىندىگىنشە قۇدايى استار كەشكى اۋىزاشار ۋاقىتىندا وتكىزىلسە دەگەن تىلەگىمدى جەتكىزەمىن. اللا تاعالا رامازاننىڭ قۇرمەتى ءۇشىن جاساعان جاقسى ءىسىمىزدىڭ سەبەبىمەن بارشامىزدى جاقسىلىققا كەنەلتكەي», دەدى ناۋرىزباي قاجى تاعان ۇلى.