گۇلميرا ساتىبالدىنىڭ ءىسى بويىنشا باستى سوت وتىرىسى باستالدى

وتكەن سوت وتىرىسىندا مەملەكەتتىك ايىپتاۋشى تاراپ سوتقا دەيىنگى ءىس جۇرگىزۋ بارىسىندا سوتتالۋشى گۇلميرا ساتىبالدىنىڭ قازاقستاننان كەتۋگە ارەكەتتەنگەنىن حابارلاعان ەدى. 

پروكۋروردىڭ ايتۋىنشا, گۇلميرا ساتىبالدىعا قىلمىستىق كودەكستىڭ 389-بابىنىڭ 4-بولىگى, 389-بابىنىڭ 3-بولىگى, 28-بولىگى, 3-بولىگى, 125-بابىنىڭ 2-بولىگى, 1 جانە 8-تارماقتارىندا كوزدەلگەن قىلمىستىق قۇقىق بۇزۋشىلىقتاردى جاساعانى ءۇشىن ايىپ تاعىلدى.

بۇعان دەيىن بۇل قىلمىستىق ءىس الماتىنىڭ المالى اۋداندىق سوتىندا قارالدى. الايدا العاشقى سوت وتىرىسىندا گۇلميرا ساتىبالدىنىڭ قورعاۋشىلارى پروتسەستى استاناعا كوشىرۋدى سۇراعان. سۋديا ولاردىڭ ءوتىنىشىن قاناعاتتاندىرىپ, ءىستى استانا قالاسى بايقوڭىر اۋدانىنىڭ №2 اۋداندىق سوتىنا جىبەردى.

ەسكە سالايىق, سىبايلاس جەمقورلىققا قارسى قىزمەت وتكەن جىلدىڭ ناۋرىز ايىندا سوتقا دەيىنگى تەرگەۋ باستالعانىن حابارلاعان ەدى. ءىس بويىنشا ايىپتالۋشىلار قايرات ساتىبالدى ۇلى, ونىڭ بۇرىنعى ايەلى گۇلميرا جانە باسقا دا تۇلعالار بولدى. 

كەيىن سوت گۇلميرا ساتىبالدىنى ەكى ايعا قاماۋعا الدى. باستاپقىدا ول 747 ميلليون تەڭگەنى جىمقىردى دەگەن كۇدىككە ءىلىندى. الايدا كەيىنىرەك انتيكور بىرقاتار كاسىپورىنداردىڭ اكتسيالارى مەن مۇلكىن زاڭسىز يەمدەنۋ, ادام ۇرلاۋ جانە زاڭسىز باس بوستاندىعىنان ايىرۋ فاكتىلەرى بويىنشا ءىستى تەرگەي باستادى.

تەرگەۋشىلەردىڭ ايتۋىنشا, گۇلميرا ساتىبالدى سۋسىن شىعاراتىن ءىرى كومپانيالاردىڭ اكتسيالارىن تارتىپ الماق بولعان. كاسىپكەرلىكتى رەيدەرلىك جولمەن باسىپ الۋ تۋرالى بۇعان دەيىن ەكى كاسىپكەر مالىمدەگەن. بەلگىلى كاسىپكەر تۇرسەن الاگۋزوۆ تا بۇل ءىس بويىنشا جابىرلەنۋشى ەكەنى انىقتالدى. كەلتىرىلگەن شىعىن كولەمى 6,6 ملرد تەڭگەدەن استام بولدى.